Compilatiecorpus Historisch Nederlands 1.0 (CHN): ambtelijke teksten 1250-1800: brussel_1388_1

<begin>
Allen den genen die dese letteren zelen sien ende hoeren lesen Reyneere geheeten Cluetnic ende gielijs geheeten de mol Scepenen van Bruesele Saluyt met kinnissen der waerheit Cont sij allen
</begin>
<main>
dat voir ons comen es in sinen propere persone Bartelmeeus geheeten tserarts doudere ende heeft op gedragen met wittegen vertijene heren janne geheeten tserarts priestere sinen neue alt recht dat die selue Bartelmeeus hadde of hebben mochte in eniger wijs in allen ende yegewelken den goiden veruerleken ende onveruerleken Eygenen Eruen leenen ende allen anderen vercregen ende onuercregen vrouwe yden geheeten tserarts wijf wilen was heren Michiels geheeten scalijs Ridders soe waer sij gelegen sijn ouermids cracht van scepenen brieuen van Bruessele sprekende van zeshondert ponden ouder groten die de voirseide vrouwe yde voirtijts geloefde de voirseiden Bartelmeeuse of den bringere der seluen brieue dair met hij gemaent heeft opter voirseider vrouwen yden ende quam tot allen hueren goiden voirseit ende die veranderde in dander hant ende vercochte nader stad rechte willeme sinen sone dair hise nader hant weder yegen gecreegh De welke brieue van zeshondert ponden groten metten anderen brieuen die dair vte gespruyt sijn dats te wetene vanden vonnisse ende dair met dat Bartelmeeus voirseit die voirseide goide willeme sinen sone vercochte ende dair hise weder met yegen den seluen willeme vercreech die voirseide Bartelmeeus den voirseiden heren janne ouergaf kinnende die selue Bartelmeus hem niet meer rechts hebbende noch behoudende aen den voirseiden brieuen of goiden Op alsulke Conditie ende vorwaerde dat die voirseide her jan geloeft heeft ende geloefde voir ons den voirseiden Bartelmeuse te ontheffene ende te ontslane jegen yegewelken van allen costen ende lasten die Bartelmeeus voirseit gehadt ende geleden heeft omme ocsuyn vrouwe yden voirseit gelijc hij voir huer vriende die vercleert heeft ende oec vanden geloeften die Sij den voirseiden Bartelmeeuse ende Bartelmeeuse sinen sone gedaen sijn daer her Eueraert geheeten voete ende her Anthonijs geheeten de wisseleer Ridderen Borgen af sijn Ende van alsulken geloeften alse vander zoenen der zaken ruerende van willeme vander loegen die gesciet sijn tot opten dach datum dis briefs ende jegen den wenne van bossut van alsulker staden alsemen vint dat die wenne gestaedt es bij willeme vander loegen ocht van sinen wegen ende dair hem Bartelmeeus douder af soude restoer doin moeten Jtem heeft noch op gedragen met wittegen vertijene die voirseide Bartelmeeus douder den voirseiden heren janne priestere alt recht dat die selue Bartelmeeus douder hadde of hebben mochte in alsulke brieue alse hij ontfaen hadde vanden voirseiden priestere dair met de selue priestere gedaen was tot allen den goiden wilen heren Michiels geheeten scalijs De welke brieue die voirseide Bartelmeeus douder den voirseiden priestere te liuereerde ende ouergaf kinnende de voirseide Bartelmeeus douder hem niet meer rechts hebbende noch behoudende in enigen vanden voirseiden brieuen ocht goiden Behoudeleken dien dat die voirseide priestere metten voirseiden brieuen sprekende vanden goiden heren Michiels voirseit hulpen ende bistaen sal des voirseiden heren Michiels Testamentoren dat sijn testament volvuldt werde
</main>
<end>
Jn getugenissen der waerheit van welken dinghen voirscreuen hebben wij scepenen voirseit onse zegele desen letteren aengehangen Ghegeuen jnt jaer ons heren alsmen screef Dusentich driehondert acht ende tachtentich opten anderen dach der maent van junio
</end>