Compilatiecorpus Historisch Nederlands 1.0 (CHN): ambtelijke teksten 1250-1800: brussel_1389_1

<begin>
Allen den ghenen die desen brief selen sien ocht horen saluut met kennessen der waerheit Cont sij jeghewelken
</begin>
<main>
dat jc Euerart tser claes her Euerarts tser claes sone wilen was gheloue jn goeden trouwen her arde van buten priester capellaen van sente goedelen in bruesele tontheffene ende minen voet voere den sinen te settene van allen moyennessen costen ende staden di[e] men den vorseiden arde doen mochte in wat manieren dat ware ouer mieds tween beslotenen coferen de welke de vorseide her art onder hadde ende ghehadt hadde van diere tijt dat onse lieue oem her jan tser claes kercmeester gheweest hedde ende prouisoer vander vorseider kercken van Sente goedelen de welke hi ons ouer gheleuert heeft albesloten
</main>
<end>
Ende want jc Euerart vorseit en ghenen properen zeghel en hebbe soe hebjc ghebeden minen lieuen ende gheminden here ende maech her clase den zwaef riddere ende minen lieuen ende gheminden maech janne vanden payhuse dat sij dit op mi bezeghelen willen Ende wij her claes ende jan vorseit ouermieds beden wille ende versuec van onsen lieuen ende gheminden maech Euerarde tser claes vorseit hebben desen jeghewordeghen brief bezeghelt met onsen properen zeghelen Ghedaen jnt jaer ons heren doe men screef M ccc lxxx ende achte viftiene jn januario
</end>