Compilatiecorpus Historisch Nederlands 1.0 (CHN): ambtelijke teksten 1250-1800: brussel_1389_2

<begin>
Cont sy allen lieden
</begin>
<main>
dat Osce de coninc natuerlec sone wilen willems conincs mj janne van sentruden priestere vercleerde ende tughede op sinen eet ende trouwe dat joffrouwe marie sconincs sine ouder moeder ende joffrouwe kateline sconincs sine moye de ghedeelten vanden zwane die sy janne den clerc ghauen te erue alsoe de scepenen brief sprect diere op ghemaect es welken enen heeft her gielijs de pape als sijns wijfs mombore de welke jans clercs dochter was want de zwane hare viel in haren lote Ende de ander brief leght hier in dese lade welken zwane jan de clerc voerseit ende sijn oer oec na hem hadden laten liggen vore den tseys want noch meer liede daer deele ane hadden en hadde gheweest dat hy ghetymmert heeft achter op die hofstat vanden zwane ene camere ane ronceuale Ende oec den hof van den ouden hert gespleten heeft vte der voerseider hofstat vanden zwane welken ronceuale ende aenden her ghegheuen sijn te erue ende waerscap gheloeft daer by soe en laten sy den zwane niet ligghen noch met vierevout tseys vertien want sy en connen haers waerscaps niet af gegaen Ouermits lieten sy den zwane liggen soe moest men de hofstat rumen also verre als de voerseide camere daer op steet ende oec den voerseiden hof ende wederkeren ten zwane wert al gheheel Vort vercleerde mj de voerseide osce dat joffrouwe marie sine ouder moeder voerseit hadde twee sustere welker de ene hadde oec op den voerseiden zwane erf tseys van welken tseyse verschoen na hare doot joffrouwe kathelinen sconincs voerseit hare suster dochter x oude groete erflec ende vrouwen katelinen van craynem hare ander nichten x oude groete soe dat joffrouwe katheline sconincs voerseit na harer moeder doot ende willems haers broeders voerseit vercochte van haren xviij scellinghe ende ij deniers groete alsoe der Erf brief in heeft ende vanden verstoruenen x groeten den huusarmen van sente goedelen iiij scellinghe ouder groete Ende namaels doen sy steruen soude soe makede sy de xv scellinghe groete in testamente ene capelrie te makene op sente magrieten outaer tsente goedelen daer sy vore begrauen es te welken xv scellinghe groete Jc jan van sentruden priestere voerseit comen ben met haren consente by gielise scalien die oec een van haren testamentoers was die met enen brieue van gheloften te haren goeden quam ende mi na der stad recht inde xv scellinghe groete erfde daer mede te doene alsoe sy mj beual ende testament in heeft welc ic metter hulpen van gode volbracht hebbe Ende want de voerseide xv scellinghe groete niet competent en sijn ter cappelrie soe hebbic vercreghen met beden ane her jan fraybaerde ende joffrouwe margrieten siere werdinnen drie bunder lants ende meer na hare doot alsoe de brief sprect daer ict mede ontfinc in augmentacien ter voerseider cappelrien behoef voer hare zielen ende hare vriende
</main>
<end>
Jn kinnessen der waerheit soe hebbic jan van sentruden priestere voerseit hier ane mjnen seghel gheset jnt jaer ons heren M CCC Tachtentich ende neghene op alre apostel dach
</end>