Compilatiecorpus Historisch Nederlands 1.0 (CHN): ambtelijke teksten 1250-1800: brussel_1417_1

<begin>
Int jaer onssheeren M cccc ende XVII xx dage in januario na ghewoente van scriven inden hove van Camerick ter groter rekeningen was biden scepenen ende goeden luden van den rade der stad van Bruessel eendrechtelyc gemaict geordonneert ende overdragen
</begin>
<main>
dat men voirtaen inder stat van Bruessel voors houden hanteren ende wisen sal voer een open recht van alle goeden die ter selver stat recht behoeren ende gelegen syn ende oic van alle anderen goeden buten ende binnen Bruessel liggende die mit scepenen brieven van Bruessel vercregen ende ten rechte van deze stat voors bracht syn so wien men bevyndt dat enich van desen voirs goeden gehouden en beseten heeft rustelic vredelic ombestuert ende ongecalengiert hy of sine vorders of de ghene daer hise tegen gecregen heeft dertich gehele jaere ende dage daer hy goet fundament ende rechtverdigen of justen tytel afheeft sonder enigterhande fraude of argelist dair niet en is vander heylighter kerken goeden dien persoen wie hy sy sal men dair inne houden ende doen houden ende beschermen ende hy sal die goede voirtaen erfelic ende ewelic behouden hanteren ende besitten voer sine propre erve ende goet ende in rusteliker ende vredeliker possessien dair af bliven niet wederstaende eenigterhande calengie hynder stoot of aensprake die hem dair tegen van yemane gedaen of geworpen mach worden altoes hier in verwaert ende versien waer yeman die sine goede becommerde of becommert hadde mit scepenen brieven van Bruessel of mit anderen voer hof en voer heer sonder argelist om syn testament of sine utersten wille te doen volvueren ende volschien of om sine kinderen nacomelinge of erfgenamen dair mede te bedwingen of te doen bedwingen dat sy huers goets niet ruekeloos quyt en souden werden noch dat quellic overbrengen dat die brieve also gemaict evenverre dat men enghene fraude dair in en bevonde bliven suelen in huerre macht ende van weerden gehouden syn by also dat de ghene die die brieve onder of in huerre macht ende in huer behout hebben binnen enen jaere na dien dat tot huerre kennissen coemt dat eenige vanden goeden daer in verpant of verhandelt vercocht verandert of becummert worden comen suelen ende sculdich syn te comen voere scepenen van Bruessel of mit orcontscappen aen den coeper ende calengieren den coep deser handelinge of de vorwairden die van dien goeden gedaen ende geschiet of in veerden syn vuytgesceyden oic den ghenen die goede te jairscaren houden of gehouden hebben dat die mit alsulker possessien den gront van dien goeden niet behouden en mogen uutgesceiden oic ende versien dat dese voirs possessie of prescriptie niet letten en sal denghenen die buten lants syn of wesen suelen den tyt van den jaeren voirs van evenverre dat de selve personen buten hebben geweest ende voirt uutgesceiden den ghenen die tgescreven recht in desen stucken uutgesceydt
Item was ter selver tyt gemaict ende overdragen om gemeyn profyt ende om neringe in der stat te maken ende om te verhueden dat tgelt cleynode juwelen ende rycheit buten der stad voirs niet gedragen noch gevuert en souden werden mer daer binnen behouden werden soe sy naest mochten dat men van nu voirtaen binnen Bruessel lyfrenten ter quitingen die men gemeynlic nuemt rachat sal mogen vercopen beyde in coren ende in gelde ende dat de scepenen van Bruessel daer over suelen staen ende wisen inder vuegen formen ende manieren hier na volgende dat is te weten dat men van den gelde den penninc niet copen en sal ter quitingen tot enen live onder acht penninge vander selver weerden ende tot tween liven niet onder thien penningen ende dmudde rogx of corens bruesselscher maten sal men copen ter quitingen tot enen live om thien guldenen vrancx cronen goet ende geve of de weerde dair af of dair boven mer niet dair onder ende tot tween liven niet onder XIIII cronen vrancx voirs of der weerden dair af ende de quitinge sal syn in deser voegen dat de vercoeper of sine hoire nacomelinge of erfgenamen na hem ende nyemane anders de voirs vercochte lyfrenten het sy van coren of van gelde suelen mogen quiten ende lossen tallen tiden alst hen genuegen sal om tvors principael gelt dat daer voer gegeven ende betaelt sal syn ende om den cost vanden brieven ende vander guedingen ende om of mit der verletter of verschenenre lyfrenten of mitten versetenen lyfpachte na belope of gelande vanden geledene ende vergangene tide het sy van maenden van jaeren van dagen of van weken ende hier voer en sal men enghene cleynode noch juwelen te panden zetten gelyc dat men duet ende hanteert in sommigen steden ende plaetsen niet verre lants gelegen mer men sal dese lyfrenten bewisen ende besetten op omberuerlike goede als eygen of erve op dat de voirs vercoeper eenige heeft die ter stad recht van Bruessel liggen of gebracht syn Ende en heeft de vercoeper deser goede niet so mach hy dair voer zetten int gemeyne alle syne goede eygene ende have vercregen ende onvercregene ende dair toe goede burghen op dat hi se gecrigen can dair den coeper mede genueght Ende altoes suelen de brieve de condicien ende de clausulen vander quitingen voirs in hebben ende begripen ende dair to beyde vanden principalen ende vanden burghen waerscap ende altoes genoech te doen op datter yet aen gebrake ende daerenboven geloven ende ten heyligen sweren het en waere dats hem de coeper mit wille verdragen woude dat sy ongheenrehande commer last noch vorwarden op huer goede gemaict noch gedaen en hebben maken noch doen en suelen datter oic sonder argelist enghene op gemaict en syn die den coeper voirs tegen sinen coep ende vurwarden ende tegen dontfanc ende de heffinge van sinen voirs lyfrenten eenich letsel prejudys of achterdeil gedragen of inbrengen moigen al worden oic eenige naderhant gemaict mit wat vesticheiden dat ware evenlanc dat de voirs lyfrenten stonden die en suelen de scepenen voirs van engheenre machten noch weerden houden evenverre dat hen de kennisse dair af toebehoeren mach Ende dairtoe of boven allen desen sal men de ghene die dese bedrigenisse ende ongewaricheit daden of hanteerden corrigeren ende handelen sonder eenich verdrach na begripe ende inhout des briefs of der privilegien gemaict in voerledene tiden op de valsche ende ongewarige vercoepers ende voirt also men valsche meynedige lude sculdich is te handelen ente corrigeren
Item was voirt geordineert overdragen ende gemaict bi den scepenen ende rade voirs overmids dat meenich simpel ende onnuzel mensch dagelix coemt voer scepenen van Bruessel die zyn saken ende stucken die hy te doen heeft ende dair om hy trecht besuect niet en weet te zeggen noch te vertrecken dair de scepenen voirs mids dat sy den gront vander materien uut hem niet verstaen noch vernemen en connen zeer mede gequelt ende gemoyt werden ende dicwile is te duchten de zaken anders termineren dan te pointe ende den ghenen onrecht gheven die nochtan dbeste recht heeft dat voertaen een yegelijc die wilt alsowael buten gebanne gedinge als in gedinge sal sine saken ende redene mogen doen thoenen ende seggen voer scepenen mit enen gesworen taelman ende die taelman sal van elker zaken die hy aldus thoent ende vertrect buten gebannen gedinge hebben vande ghenen diene te werck stelt enen Jans penninct vleemscher munten die nu doet drie grote starck brabands gelts of de weerde dair af ende niet dair boven ende van elke zaken die hy thoent ende spreect in gebannen gedinge sal hy telken male hebben twee oude grote tournoys of de weerde dair af ende niet meer Ende de clerke vander stat voirs suelen alle vonnissen die de scepenen wisen by maningen des ammans et sy in gebannen gedinge of dair buten tekenen ende registreren tot dien eynde dat mense in toecomende tiden vynden moige ende oic te bat weten als de gelike zaken of materien gevallen hoe dat menze hanteren sal ende uutrichten ende elc vanden drien clerken sal dair toe een sunterling boeck of register hebben ende maken dair hy de voirs vonnissen in sal tekenen ende sy suelen van elken vonnis aldus getekent hebben van partyen twe oude grote alsulke als voirscr syn of de weerde dair af Ende op dat een yegelyc die hem selven weet ende kendt onrecht te hebben te meer schuwe voer trecht te comen ende trecht te moeyen soe is geordineert dat die ghene van partyen die int onrecht vonden wordt sal den voirs cost van clercken ende van taellieden sinen wedermanne moeten gelden ende op richten sonder verdrach
</main>
<end>
Collacio facta est cum origina lilittera
</end>