Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1278_1

<begin>
Alle die ghene die desen brief sullen sien ende horen Tieleman ver machtilden sone Jan die vriese heinric die vriese ende Ghisebrecht maleghijs scepenen in dordrecht saluut ende kenninghe der waerheit Wi doen v te verstane
</begin>
<main>
dat here hughe here woutere van kruninghe here Jan vander maelstede Ridders Gherard vander maelstede Clais van barsdorp ende boudin shere dankards sone hebben ghelouet vore ons ghesamender hant dat si den here heinrike vander lecke Riddere sullen ghelden van daer si borghe of sijn vore heren pieter van barselen ieghens hem binnen den Naesten achte daghen na dat dese brief was ghegheuen sullen si hem iof sinen sekeren bode senden te Dordrecht ander half ondert lib enghelsc ende also sulken cost alse die vorseide here vander lecke vore hem heuet ghedaen te dordrecht te goeder rekeninghen ende vergouden ende ne senden si dien cost metten vorseiden penninghen niet ten vorseiden tarmine so souden si hem ten Naesten baemesse achte ende vijftich marc hollansc vore dien vorseiden cost ghelden ende ne gouden si die anderalf ondert lib enghelsc niet ten vorseiden tarmine so souden si in comen in comen licghen te dordrecht Jnder manieren dat si laghen eer dese vorworde was ghemaect ende ne quamen si niet in selfmaent so soude horlijc ghelden den vorseiden here vander lecke vijftich lib hollansc te pinen vort so hebben si hem ghelouet te gheldene ten Naesten baemesse vijftich lib enghelsc ende die sullen hier tuschen staen te Cauwercine coste ende dien cost sullen si hem dan ghelden metten vijftich lib enghelsc ende metten achte ende vijftic marken hollansc mare senden si den vor screuenen cost metten eersten vorscreuenen penninghen so waren die achte ende vijftich marc hollansc quite Ne daden sijs niet so souden si in comen des anderen daghes selfmaent te lecghene alst vorscreuen es te dordrecht ende ne quamen si niet in so soude horlijc ghelden den vorseiden here vander lecka vijftich lb hollansc van pinen vort sullen si hem ghelden ten Naesten sente martins messe Ondert lib hollansc Ne daden sijs niet so sullen si selfmaent jn comen jn comen licghen alst vorscreuen es ende ne quamen si niet jn so souden hem hoerlijc ghelden vijftich lib hollansc te pinen vort hebben si hem ghelouet te gheldene ten Naesten vastenauonde wat dat men hem hier bouen sculdech bliuet also als sine hantvaste houdet diehidaer of heuet te goeder Rekeninghen Ne daden sijs niet so souden si binnen den naesten achte daghen daer na te dordrecht in comen selfmaent te lecghene alst vorscreuen es niet daer vte te scedene sine hebben hem ghenoech ghedaen vanden vorseiden penninghen ne daden sijs niet so soude horlijc hem ghelden vijftich lib hollansc van pinen ende van alder vorseider pinen bliuen si nochtien tote elken tarmine inde borchtoch also datmense manen mach van oefstoele ende van pinen ghemeene van daer si te voren jn waren vort hebben die vorseide borghen vore ons verghiet sonder boudin allene dat si alle de vorworden hebben ghelouet te houdene vore den Graue van hollant ende dat si wulfarde sheren heinric wissen sone ende den vorseiden boudine vervanghen want sijs vore den Graue van hollant niet belouet hebben dat si dese vorscreuene voreworden sullen houden ende horlijc vore vijftich lib hollansc te pinen tote elken tarmine
</main>
<end>
Jn orkonde desen brieue die wi beseghelt hebben met onsen seghelen Ende wi here hughe here woutere van kruninghe here Jan vander maelstede Ridders ende boudin sheren dankards sone omme dat dese vorscreuene vorworde vast bliue ende ghestade so hebben wi desen ieghenworden brief beseghelt met onsen seghelen ende wi Gherard vander maelstede ende Clais van barsdorp want wi ghene seghele bi ons hadden so houden wi ons ander vorseider borghen seghele die si an desen brieue hebben ghehanghen bider vorscreuene scepenen seghele Dese brief was ghegheuen jnt jaer ons heren m cclxxviij jn onser vrouwen daghe te midden hogheste
</end>