Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1281_1

<begin>
vanden letteren te beselghelne Wi Pieter ver Dibburghen sone heineman suus pieter sheren wicghers sone willem van waes pieter die keiser Clais Ome Roelf Jan maleghijs ende heinric sheren alards sone Scepenen martin wenke heinric die snider heinric monbare willem rauen ende clais die monter Raetsmanne van Dordrecht doen kont alle den ghenen die desen brief sullen sien ende horen
</begin>
<main>
Dat wi bi ghemeenen rade der goeder liede van Dordrecht jndien jare ons heren alsemen scriuet mcc een ende tachtich palme sonen daghe Omme ghemeene orebare hebben ghemaect ende gheset aldus ghedane kore eweleke te ghedurene toter wilen dat se scepenen ende raet met ghemeenen rade verbeterden Alse so wie die enegherande letteren heuet beseghelt met scepenen seghelen wie dat si waren binnen Dordrecht het si van scoude van voreworden iof van enegherande sake die vor scepenen ghemaket es Ende die letteren van jare te jare heuet bewaerd intijds alse hi sculdech es te doene so dat scepenen die letteren ghesien hebben binnen jaers ende dat orkonden onder hare seghele Ende die danne die letteren binnen jaers vore ons brocht hebben so Dat wise goet ende gaue kennen onder onse seghele die scepenen sijn Die es vorward meer eweleke beward met dien letteren so dat hise nemmermeer darf verniewen vort so wat voreworden iof letteren vore ons ghemaket sijn iof ghesproken ende wi die scepenen sijn beseghelt hebben ende die dat verwaerd binnen jaers van scepenen die na ons comen sullen so dat si die letteren goet ende gaue kennen onder hare seghele die es daer mede eweleke bewaerd Ende daer naer altoes vort so wie die tuier pare scepenen letteren heuet binnen jaers verwaerd diene darver nemmeer ende es daer mede verwaerd
</main>
<end>
Jn orkonde van desen dinghen so hebben wi desen brief beseghelt metter stede heimeleken seghele Dese brief was ghegheuen jnden seluen jare ons heren Ende op den seluen palme sonen dach
</end>