Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1284_1

<begin>
Wi Scepenen ende Raet van Dordrecht maken kont alle den ghenen die nv sijn ende sijn sullen
</begin>
<main>
dat wi willen laten lecghen in ghewaerder hant te onsen behoef ende te michiels bacheleers die viere hondert pont vlaemsc die wi tote Ghent hebben ghefyneerd op onsen cost alst ghesproken es Jn deser manieren est dat sake dat wi met onsen here den Graue van holland ouer een comen ende hi ons beseghelt sulke voreworde alse wi met hem ghesproken hebben so willen wi dat die vorseide michiel vanden vorseiden penninghen op heffe ende in neme sine penninghe die hem die vorseide graue sculdech es daer wi borghen of sijn ende in sinen leestene ende lecghene comen sijn ende daer hi ons ghenen dach of heuet ghegheuen Ware oec dat sake dat wi met onsen vorseiden here niet ouer een ne quamen altoes souden wi iof wie dat scepenen ende raet in Dordrecht waren den vorseiden michiele leesten ende lecghen also alse wi daer in comen sijn hare thoe
</main>
<end>
Jn orkonde desen brieue beseghelt met onser stede seghele Die was ghegheuen int jaer ons heren mcc viere ende tachtich des vrien daghes vore meye
</end>