Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1284_3

<begin>
Wj Florens Graue van Hollant maken kont ende kenleec alle dien ghenen die desen brief sullen sien ende horen
</begin>
<main>
Dat wi bi onsen vrihen wille ende bi Rade ons Raets onsen lieuen ghetrouwen portren van Dordrecht omme menichfouden ghetrouwen dienst die si dicken vliteleke ende ghetrouweleke onsen vordren ende ons ghedaen hebben ende altoes ghereet sijn te doene Tote alle der ander vriheden ende priuilegien die si witteleke ende Redenleke an onse vordren ende an ons verworuen hebben aldusghedane vrihede hebben ghegheuen Dat si eweleke ende altoes van alrehande goede ende van alre Coepmanscepen jn wat Scepe iof op wat bodeme si sijn vri iof tholnebare hare goet leghet Tote Gheruliet ende tote Strienemonda ende ouer al anders waer jn onser grauescap ende in al onsen lande tholne vri varen sullen ende quite sonder dat si te Ammers te Mordrecht te Niemansfrient ende te Almesvoete tholne gheuen sullen alse hoere hantvasten houden die si van onsen vordren ende van ons daer of hebben Ende van brode ende van broet ghelde van wine ende van wijn ghelde dat die here van striene ende dat kint van pytte van onsen vorseiden portren plaghen te nemene ende te doen nemene van bakijn ghelde iof van gheleede alse si segheden daer of sullen wise eweleke vri houden ende quite Vort so ne sullen wi noch niemene van onser weghen ons nemmermeer onderwinden van gheenrehande makelardien noch van samecope binnen Dordrecht wech te gheuene noch te vercopene noch te verhurene noch te verleenene Neware dat elc man die goet man ende portre es hem daer ane gheneren sal alse Scepenen ende Raet met onsen Baeliu iof met onsen Rechtere koren fisieren ende ouer een draghen Ende daer thoe ghelouen wi onsen vorseiden portren dat wi hem Scepenen ende Raetsmanne maken ende setten sullen in alder manieren dat onse here onse vader Scepenen ende Raetsmanne plach te settene ende het bi sinen tyden in Dordrecht plach te wesene Vort so wat manne te landeward binnen Zuutholland eneghen portre van Dordrecht enegherande sculd sculdech es die vore viere scepenen iof vore mee van Dordrecht ghemaect es ende die sculd niet ne betaeld te sulken daghe alst ghesproken es die sculd sal onse baeliu van Zuutholland wie dat hi bi tyden es in panden van sinen ghereetsten goede ghelike ioft binder vriheden van Dordrecht ware
</main>
<end>
Omme dat alle dese vorscreuene vriheden ende ponte vast ende ghestade bliuen ende wise onsen vorseiden portren eweleke houden willen sonder enegherande arghelijst So hebben wi hem desen brief ghegheuen beseghelt met onsen Seghele Die orkonden die hier ouer waren dat waren here Gherard vander wateringhe ende here wlfard van barsele Riddren ende meester Gherard van leyden onse clerc Dese brief was ghegheuen jn die haghe jnt jaer ons heren Dusent tuee hondert viere ende tachtich jaer des woens daghes na achte na pinxtren
</end>