Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1284_5

<begin>
Die kore vanden Eruen Wj Florens Graue van Holland maken cont ende kenleec alle den ghenen die desen brief sullen sien ende hore[n]
</begin>
<main>
[dat] [wi] bi ghemeenen rade ons Raets onser lieuer Scepenen ende Raetsmanne van Dordrecht hebben ghemaect aldusghedane k[ore] omme] die ghemeene orebare ruste ende omme vrede ende dinghe te voresiene daer hier namaels tuist ende suar[hede] [of] comen mochte eweleke vast ende ghestade te bliuene ende sonder enegherande arghelyst te houdene binnen der [vorseider] stede van Dordrecht So wie het si portre iof gast enegherande Erue hofstede jof huus met den andren ghemee[ne] [heuet] Ende die danne dat meeste deel daer ane heuet die mach dat Erue hofstede iof huus gheheleke dat minste deel metten meest[en] verhuren wien dat hi wille so hi best ende dierst mach Ende omme sulke hure alst ghelden mach So sal hi dat selue hebb[en] ende behouden die ghene diet meeste deel daer in heuet est dat hem voghet ende hijt behouden wille Ne wille hi dies oec niet behouden die ghene die dat minste deel daer ane heuet die mach dat selue gheheleke behouden ende besitten omme die selue hure dat ghelden mach Ware dat sake dat die ghene diet meeste deel daer ane hadde dat Erue iof die hofstede [] hadde die soude dat minste deel hebben in hurewaren alst an een wederside vandien Erue goude voet [voet] ghelike] [metten] andren Erue hofstede iof huus ghemeene heuet elkerlijc effen vele ende dies niet ouer een ghedrag[hen] [] te verhurene iof te besittene iof te betymmerne So wat scepenen ende Raetsmanne iof die meerre partye van hem daer [of] [secghen] setten ende ordineren dat sal an beden siden vast bliuen ende ghestade endedat secghen setten ende ordineren sullen si henden ende vor[tbrenghen] binnen den naesten viertien nachten na dat sijs vermaent worden van den enen iof van beeden daer die sake of roerd Vort est be[spro]ken ware dat sake dat hiemene enech Erue iof hofstede betymmert hadde iof husinghe daer op staende hadde ende sine [hure] vte ware iof dat hi ghene hure daer ane betoghen mochte die sal dat vort besitten ende behouden omme sulke hure alst gheldet an elke side vandien Erue iof van dier hofstat voet voet ghelike Jof ne voghet hem niet langher daer op te bi[d]ene so s[a]l die ghene dies dat Erue iof die hofstede es dat huus iof die husinghen die daer op staen an hem lossen ende copen omme [al sulke] [effe]ninghe alse scepenen ende Raetsmanne iof die meere partye van hem scieren ende secghen dat goet si En[de] [dat] [secghen] [ende] scieren sullen si vortbrenghen ende henden binnen den naesten viertien nachten na dat si dies vermaent ende [] [] iof van beden daer die sake of roerd ende est dat den ghenen dies dat Erue iof die hofstede es der husinghen [] noch ne wille so mach die ghene dies die husinghen sijn die vercopen wien dat hi wille so hi best mach inder selu[er] [vorsei]der huren Vort so wie een Erue betymmert iof beseten heuet tere eweleker huren iof tenen besprokenen tarmine ende [vore] dien tarmine steruet ende sine Erfnamen dies niet ne vermoghen van noede iof van aremoeden te besittene selue [so] [moghen] [si] dat huus iof wat si daer op staende hebben verhuren ende vercopen ende dat Erue verhuren inder seluer vorseider huren ende [tote] den vorsprokene tarmine so wien dat si willen sonder des gheens openbaren vianden dies dat Erue es ende daer hi seker si van siere jaerleker huren
</main>
<end>
Omme dat dese kore eweleke [vast] bliue ende ghestade so hebben wi met onsen seghele ende die stede van d[or]drecht met haren seghele desen brief beseghelt Die was ghegheuen jnt jaer ons heren mcc viere ende tachtich der heilegher cru[cen] [daghe]
</end>