Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1287_1

<begin>
Wij Scepenen ende borgher meysters van Dordrecht maken kont ende kenlike
</begin>
<main>
dat wij sculdich sijn voer die ghemeene stede Ghysebrechte verwijfghoeden sone Tien pont brabandere die heb wij heme belouet jn ghemeene hant ende onghesceden te paeschen dat naest toe comende es tebetaelne ne dede wijs niet soe soude wij comen jn ene herberghe binnen Dordrecht daer ons die vorseide Ghysebrecht jn wiset jof sijn ghewarde boede telecghene alse recht es tidighe maeltijt tedone vte der vorseider herberghe niet tevaren wine hebben die vorseide penninghe betalet den vorseiden ghysebrechte
</main>
<end>
Jn orkonde desen brieue Die ghegheuen was jnt jaer ons heren m cc seuen ende tachtich dincsendaghes na sinte andries daghe
</end>