Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1289_4

<begin>
Wij Scepenen ende Raet jn Dordrecht maken kont ende kenleec alle den ghenen die desen brief sullen sien ende horen
</begin>
<main>
dat wij sculdech sijn vore die ghemeene stede van Dordrecht onsen lieuen ghetrouwen gheselle Gilise ver haduien sone die houdere es van desen brieue Dartech hoede goedes Rucghes die hebben wij hem ghelouet te bethaelne te jngaende auguste dat naest coemt jof also vele penninghe daer voren alse danne Dartech hoede goedes Rucghes ghelden moghen Ne daden wijs niet binnen vierthien nachten na dat hi ons ghemaent hadde thenden den vorseiden tarmine so soude die vorseide Gilis vore elke Thien pont hollands also varre alse die vorseide Rucghe gheliepe hebben een pont ghelds jaerleker renten te sinen vrihen heighendoeme jn sulken Eruen vanden eenen hende jn waerd alse die stede van Dordrecht heuet an die lantsyde die ghecoft waren ieghens Niclause van pytte
</main>
<end>
Jn orkonde desen brieue beseghelt met onser stede seghele Dese brief was ghegheuen jnt jaer ons heren m CC Neghene ende tachtech te belokene Pinxtren
</end>