Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1290_1

<begin>
Wij jan [putoc] [jan] van strien gieliis sharen jacobs sone ende jacob sharen ghiben suagher Scepene jn d[ordrec]ht orkonden ende kennen ende maken kont ende kenle[c] alle den ghenen die desen brief sullen zien jof horen
</begin>
<main>
Dat voer ons quam alse voer scepene haer ghyse dien men heet dukinc ende verliede dat hi sculdich es haren willeme dukinghe sinen broeder die houdere es van desen brieue hondert pont niewer inghelsche ende seuene ende tachtich pont sconinx penninghe van inghelant ende dese vorscreuene penninghe heuet hi ghelouet te gheldene toet des voerseiden haren willamens wille vp alle dat goet dat die voerseide haer ghyse lecghende heeft binnen der port van dordrecht jof buten der port jof waer datd gheleghen es binnen der baelivscap van zuutholland waer dat sake dat die vorseide haer willem siinre penninghe niet langher ne mochte noch ne woude omberen ende hi die penninghe die hier voerscreuen staen te coste ende te scaden wonne Dien cost ende dien scade sal hem die voerseide haer ghyse vp rechten ende ghelden metten hoeftstoele
</main>
<end>
Jn orkonde desen brieue die was ghegheuen jnt jaer ons heren mcc ende Neghentech des saterdaghes naest half vastene
</end>