Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1290_4

<begin>
vanden zoute te vermetene den porters vander scoele vander costerien ende van allen priuilegien vast te houdene Wij Florens Grave van Hollant maken kont ende kenleec alle den ghenen die desen brief sullen sien ende horen
</begin>
<main>
Dat wij Omme den meneghen ghetrouwen dienst die onse lieve ghetrouwe Portren van Dordrecht onsen vordren ende ons dicken ende menechwarf vliteleke hebben ghedaen ende altoes sijn ghereit te doe[ne] So hebben wij hem verdraghen ende quite ghelaten dat men gheenre portre zout van Dordrecht sal vermeten Ende [sij] [vriele]ke ende vredeleke binnen onsen lande onvermeten varen sullen met horen Rechten tholne met zoute ende met [co]rne Ende dat wij des vermetens van zoute Noch der coren maten Nemmermeer an hem begaren sullen te hebbene noch dat wij ons dies niet sullen anetrecken noch onderwinden Vort So hebben wij onsen vorseiden Portren ghehenghet [ende] ghegheven Dat [sij] [e]weleke vortwaerd meer die Ghifte vander Scole jn Dordrecht ende vander Costerien al daer Selue gheven moghen daer sij willen ende dien sijre jonnen Ende al dat Recht dat wij hadden jnden Steeninen Thorn jeghens dat kerchof dat scelden wij tote onser vorseider portre behoef vri ende quite Uort So gheorlouen wij onsen vorseiden portren van Dordrecht So waer sij Erue lecghende hebben binnen hore vriheden het si op der havenen joft after joft voren dat sij dat betymmeren moghen ende hore orebare daer mede doen sonder onsen scade Ende alle die vriheden ende Priuilegien joft hantvasten die on[se] [vorseide] [port]ren van Dordrecht ane onsen vordren ende ane ons witteleke ende Redenleke hebben vercreghen ende ghewonn[en] [ende] [sij] [bethoghen] moghen die ghelouen wij hem eweleke vast te houdene sonder arghelist ende ghestade Ende vore onsen ra[et] [die] [daer ov]er waren ende onse hogher manne een deel heren janne van arkele heren willeme van Egghemonde heren Die[derike] [van] [wassen]are Riddren ende vore anders vele goeder liede
</main>
<end>
So hebben wij hem desen brief doen beseghelen m[et] [] [on]sen seghele [Dese] [brief] was ghegheven jn Dordrecht jnt jaer ons heren Dusentech Tuee hondert ende Neghentech te half aprelle
</end>