Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1291_1

<begin>
Wi Florens Grave van Hollant maken cont ende kenleec alle dien ghenen die desen brief zien zullen ofte horen lezen
</begin>
<main>
Dat wi sculdech zijn gheestliken lieden ende eraichteghen den Commendoer ende den broderen vanden dvitschenhuze van Covelense die houders zijn van desen brieve Tvee duzent pont hollanscher penninghe te goeder rekeninghe tuschen ons ende hem gheliker wijs dat onse brieve spreken die wi hem hier voermaels daer op ghegheven hebben Ende die ene helft van desen penninghen alze duzent pont die zulle wi ghelden ende betalen desen voerghenoemden Commendoer van Covelense ofte den Commendoer vanden dvitschenhuze van vtrecht van zire weghe ofte wien dien hi maket gheward boede met sinen openen lettren binnen der port van Dordrecht tote bamisse dat nv naest toe comende es Ende die andre helft van desen penninghe die zulle wi hem ghelden ende betalen alze duzent pont tote zente martijns misse daer na vore midden winter ende oec binnen der port van Dordrecht Mare waer dat sake dat wi des niet ne daden dat wi niet ne betaelden dese Tvee duzent pont te goeder rekeninghe tote desen tveen daghen die hier voren ghenoemt zijn alze tote bamisse ende zente martijns misse desen voerghenoemden Commendoer van Covelense ofte den Commendoer van vtrecht van zire weghe ofte zinen ghewaerden boede die zine opene lettren broichte Soe hebwi hem hier af te borghe ghezeth met ghezaemender hant Lambrecht den vriese borgher van vtrecht ende Rycovt van Nordeloes onse knapen dat si inne varen inne varen zullen ligghen tote Delf in ene herberghe zoe wanneer dat zijs ghemaent worden van desen voerghenoemden Commendoer ofte zinen ghewaerden boede hem zeluen te winnen ende daer inne te etene ende te drinken ende des naichts te slapen ende te bliuene ende hore rechte maeltijt te houdene Vordane Thielmanne ver magtilden zoene Gherarde wittekenne Pieter ver dibborghen zoene Henrike den vriezen Gilize iacobs zoene Janne ver dyedwighen zoene Gilize ver hadewighen zoene Janne den keyzer Wolbrande den vrieze ende heinen Gheraerts wittekens zoene onse lieve ghetrouwe portre van Dordrecht Dat zi zullen ligghen binnen tveen herberghen in die port van Dordrecht die hem die Commendoer van Covelense ofte die Commendoer van vtrecht van zire weghe ofte zijn ghewaerde boede wizen zal ende daer inne te etene ende te drinkene ende des naichts te slapene ende te bliuene ende hore rechte maeltiet te hovdene ende hem zeluen te winnen ende vte dien herberghen zoe te Delf zoe te Dordrecht nieman te sceidene noch te keren Eer desen voerghenoemden Commendoer van Covelense Den Commendoer van vtrecht van zire weghe ofte zinen ghewaerden boede dese Tvee duzent pont tote desen tveen daghen vol ende al betaelt zijn alze hier voren ghescreven es Waer oec dat sake dat enech man van desen voerghenoemden borghen alzoe ghescepen stoede dat hi doer noets wille ofte doer comanscap ene corte wile moeste vit wesen Soe soude hi dan enen man voer hem doen ligghen die alzoe costeliech ware alze hi tote zire weder coemst Ende zoe wanneer dat hi weder quame zoe zoude hi des anders daghes weder gaen ligghen in die herberghe daer hi vit voer met anders den borghen ende hovden zine trouwe van ligghene alze hier voren ghescreven es Ende nieman ne mach hem onsculdeghen met andren hine moet ligghen ende leisten sonder merren zoe wanneer dat hijs irst verven ghemaent wordet van desen voerghenoemden Commendoer van Covelense ofte van sinen ghewaerden boede Vordane waer dat sake dat wi niet ne betaelden die Duzent pont ten irsten daghe tote bamisse alze hier voren ghescreven es zoe zoude dan dese voerghenoemde Commendoer van Covelense ofte zijn ghewaerde boede weder intreeden vrilike sonder imans weder zegghen van onsen thalven inne tfirendeel van al onsen renten ende tolne ombecommert van imene ende die oppe boren alzi hier voermaels ghedaen hebben gheliker wijs dat hore brieve spreken die wi hem hier te voren daer oppe ghegheven hebben Ende hier bi zoene moghen heme dese voerghenoemde borghen die wi hem ghezeth hebben niet onsculdeghen dat zi hier bi quite zullen wesen zine moeten ligghen ende leisten alzi te voren deeden toe dire tiet dat heme hoer penninghe volcomenlike zijn betaelt Vordane zoe wille wi dat alle dese voerghenoemde vorwaerden die hier voren ghescreven zijn in desen brieve tuschen ons ende den Commendoer van Covelense ofte zinen ghewaerden boede niet scaden noch letten moghen ane onsen irsten brieven die wi heme ghegheven hebben ende ane den borghen die wi heme daer af ghezeth hebben zine bliven machtich alze te voren toe dire tiet dat wi heme hoere penninghe hebben betaelt Vordane wi Florens Grave van Hollant Ende wi borghen alle ghemeenlike die hier voren ghenoemt zijn vertien alles gheistlijchs rechts waerlijchs rechts hervaerde ofte heerscaps ghebot ofte engherhande brieve die wi nv hebben ofte namaels ghekrighen moichten ofte zoe wat saken die menre toe trecken moichte dat ons ne ghene zake helpen mach noch bescermen wine zullen ligghen ende leisten alze ghetrouwe borghen in al dien maniren gheliker wijs dat hier voren ghescreven es Ende wi Florens Grave van Hollant ende wi borghen alle ghemeenlike die hier voren dicke ghenoemt zijn gheloeven voer ons ende vore onze erfnamen den Commendoer ende den broederen van Covelense ofte horen ghewaerden boede wittelike ende trouwelike vaste ende ghestade te hovdene alle dese vorwaerden die hier voren ghescreven ende ghenoemt zijn
</main>
<end>
Jn orconde ende in ghestadecheden van desen dingen zoe hebwi Florens Grave van Hollant ende wi borghen desen brief doen bezeghelen met onsen zeghelen Deze brief waert ghegheven int iaer ons heren alsmen scrivet Duzent Tveehondert ende Neghentech des zaterdaghes vore den zonnendach als men zinghet Oculi mei semper
</end>