Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1291_4

<begin>
</begin>
<main>
Dese core sijn vut ghegheuen biden baliu Rechtere Scepenen ende Raesmanne van dordrecht Ende hebben al soe ouer een ghedraghen vaste ende ghestade te houdene Jn der manieren van allen makelardien die men doet binnen der stede So wie dat wille mach hem onderwinden makelare te wesene die poerter es Si dat sake dat hi berechten kan den ghenen die in coept ende die vercoept Ende wat makelaren dat versprake enen andren makelare ombe dat hi hem gheneren wilde ghelike hem met makelardien Ende des betuucht wordde met tween wittachteghen orkonden warent poertre jof gaste die hadde verboert x lib Waer oec dat sake dat hi sine boete niet en mochte ghelden Die rechter van der stede soude den ghenen legghen in suare vancnesse Ende daer soude hi in ligghen alse langhe wile dat men heme elkes daghes af sloeghe xij d hollansche toter wilen dat die voerseide x pont quite waren Voert sloeghe een makelare den andren makelare ombe dat hi hem onderwinden wilde makelardien Die verboerde x lib ende sijn ambocht een jaer Wordde hi betuucht alst es voerscreuen Voert vinghe hi an makelardien jof onderwonde hise hem te doene binnen den jare dat hem verboden ware alsoe alst es voerscreuen te doene hi soude die poert rumen een jaer Voert sone moet noch en sal ouer ene coepmanscepe wesen van alre makelardien meer dan twee makelaren op die boete die voerscreuen es Voert ware dat sake dat deen makelare den andren sinen coepman bename jof ontoghe ende des betuucht wordde alsoe alst es voerscreuen die ware in boeten van x ponden Voert sloghe een makelare enen coepman ombe dat hi met hem niet coepen en wilde noch vercoepen vut noch in Die ver[b]oerde [x] lib wordde hi betuucht alst es voerscreuen Dese coren selen staen toter wilen dattene scep[enen] [y]et weder segghen
</main>
<end>
Jn orkonde desen brieue die es bezeghelt met den clenen zeghele van der [stede] [van] dordrecht Die ghegheuen was jnt jaer ons heren mcc ende een ende Neghentich jn sente lucas daghe
</end>