Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1291_5

<begin>
Wi Florens Grave van hollant van zelant ende here van vrieslant maken cont ende kenleec alle den ghenen die dese letteren sien sullen iof horen lesen
</begin>
<main>
Dat wi sculdech sijn haren Lambrechte den vriese van vtrecht riddre die houder es van desen brieve Tvaelf dusent pont hollanscher penninghe die ghenghe ende ghave sijn Ende dese voerghenoemde penninghe bewize wi hem ofte sijnen erfghenamen waer dat sake dat sijns ghebrake jn te nemene in allen onsen renten ende tolne op cominghe ende voerval binnen onsen lande Alse in Zelant Suthollant Northollant ende in Vrieslant vit ghenomen den goede van portvliet dat wi behouden toete onser cost Ende gheloven desen voerghenoemden haren Lambrechte iof sijnen erfghenamen of sijns ghebrake jn dese voerghenoemden rente ende tolne op cominghe ende voerval daer inne te houdene wi ende onse nacomelinghe toe der wilen dat hi dese tvaelf dusent pont inne hevet ghenomen volcomenlike sonder engherhande archeit Ende hier voren hebwi desen voerghenoemden haren Lambrechte iof sijnen erfghenamen waer dat sijns ghebrake Te borghe ghezet onse porten van onsen lande Alse Dordrecht Middelborg Zyrixe Delf Leyden ende haerlem in desen maniren waer dat sake dat desen voerghenoemden haren Lambrechte iof sijnen erfghenamen waer dat sijns ghebrake ennich commer iof scade quame van desen voerghenoemden renten tolne op cominghe ende voerval alsoe dat hi daer vte worde ghedaen bi ons iof onsen nacomelinghen ofte bi anders iemene dat niet ghescien sal of god wille Dat dan die Scepenen ende die Raet van onsen porten die hier voren ghenoemt sijn soe wie dat si waren in dien tijden jnne souden varen licghen ighelijch inne hoers zelves port inne ene herberghe Die hem dese voerghenoemde haer Lambrecht sijn ghewaerde bode jof sijne erfghename waer dat sijns ghebrake wijsen sullen Ende daer inne te eetene drinken slapen ende hem selven te winnen ende inne die herberghen te licghene wittelike ende trouwelike alse licghens recht es ende daer niet vte te varen vore die tijt Dat desen voerghenoemden haren Lambrechte jof sijnen erfghenamen waer dat sijns ghebrake Dese voerghenoemde Tvaelf dusent pont ende die scade die hem daer of comen mochte vol ende al ware betaelt Ende negheen Scepen noch Raetsman van onsen porten die hier voren ghenoemt sijn En mach hem onsculdeghen met andren hine moet licghen ende leisten alse goit borghe met hem selven ende met anders niemene soe wanneer dat hi ghemaent wordet van deser bortocht gheliker wijs dat hier voren ghescreven es Ende omme dat sake dat dit haren Lambrechte den vriese riddre jof sijnen erfghenamen waer dat sake dat sijns ghebrake vaste ende ghestade van ons ende van onsen nacomelinghen blive soe hebbe wi hem dese ieghenwordeghe letteren doen beseghelen met onsen seghele Ende ghebeden onsen porten die hier voren ghenoemt sijn Alse Dordrecht Middelborg Zyrixe Delf Leyden ende Haerlem Dat si dese borgtocht in al dien maniren dat hier voer sproken es met ons beseghelen metten seghelen van hoeren porten Ende wi Scepenen ende Raet vanden porten die hier voren ghenoemt sijn doer beeden wille ons heren sgraven van Hollant soe ghelove wi allegader dese bortocht wittelike ende trouwelike te houdene alse goede borghen in alle den vorwaerden dat hier voren ghenoemt ende ghescreven es van ons ende vertien alles des rechts daer wi ons mede weren mochten jeghen dese voerghenoemde bortocht wine moeten leisten alse goede wittafteghe borghen alle dese vorwaerden in al dien maniren dat wi ghelovet hebben ent voren ghesproken es
</main>
<end>
Ende omme dat sake Dat wi dit vaste ende ghestade willen houden soe hebbe wi dese letteren doen beseghelen metten seghelen van onsen porten Dese letteren worden ghegheven jnt jaer ons heren Dusent Tvehondert Tve ende Neghentich des dienxsdaghes vore sente marx dach des EwangelisteN
</end>