Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1292_1

<begin>
Wi henric ser gherards sone Ende gillis voren hadewien sone scepenen in dordrecht orcunden Ende kennen
</begin>
<main>
dat vor ons quam her ghise dukinc Ende verliede dat hi sculdich es harem willeme dukinghe sinen broeder een ende vijftich pont nuwer enghelsere Ende neghen scellinghe des coninx enghelse van enghelant dese vorseide penninghe sal die vorghenoemde her ghise ghelden tote ser willems dukincs wille sijns vorseids broeders waer dat dese vorseide her ghise haren willeme sinen broeder dese vorseide penninghe niet en goude tote sinen wille als hier vorsproken es so wat coste ende wat scaden so die vorseide her willem omme dese vorseide penninghe dade die soude die vorseide her ghise vp rechten met den hoeft stoele Ende dit heuet die vorseide her ghise ghelouet haren willem sinen broeder vp al sijn goet dat hi heuet ligghende binnen dordrecht jof der buten
</main>
<end>
In orcunde desen brieue die ghegheuen was int jaer ons heren mccxci des sonen daghes vor sente agneten daghe
</end>