Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1292_2

<begin>
Wi Florens Graue van hollant van zelant ende here van vrieslant maken cont ende kenleec alle den ghenen die dese letteren sien sullen of horen lesen
</begin>
<main>
Dat wi sculdech sijn haren Janne here van arkele onsen ghetrouwen man Lambrechte den vriese borgher van vtrecht ende Rycoude van nordeloes onsen knapen die houder sijn van desen brieve Tvaelf dusent pont hollanscher penninghe die ghenghe ende ghaue sijn Ende dese voerghenoemde penninghe bewize wi hem of horen erfghenamen ware dat sake dat hoers ghebrake jn te nemene in alle onse rente ende tolne op cominghe ende voerval binnen onsen lande alse in Zelant Suthollant Northollant ende in vrieslant vit ghenomen den goede van portvliet dat wi behouden toete onser cost Ende ghelouen desen voerghenoemden here van arkele Lambrechte den vriese ende Rycoude of horen erfghenamen of hoers ghebrake met goeder trouwe in dese voerghenoemde rente ende tolne op cominghe ende voerval daer inne te houdene wi ende onse nacomelinghe toe der wilen dat sij dese voerghenoemde Tvaelf dusent pont inne hebben ghenomen volcomenlike sonder engherhande archeit Ende hier voren hebwi desen voerghenoemden here van arkele Lambrechte den vriese ende Rycoude of horen erfghenamen of hoers ghebrake hem te borghe ghezet onse porten van onsen lande alse Dordrecht Middelborg Zyrixe Delf Leyden Haerlem ende alcmaer in desen maniren ware dat sake dat desen voerghenoemden here van arkele Lambrechte den vriese ende Rycoude ofte horen erfghenamen of hoers ghebrake ennich commer of scade quame van desen voerghenoemden renten tolne op cominghe ende voerval alsoe dat si daer vte worden ghedaen bi ons [] [of] onsen nacomelinghen of bi anders iemene dat niet en sal gheschien of god wille dat dan die scepenen ende die raet van onsen porten die hier voren ghenoemt sijn soe w[ie] [dat] [si] waren tien tieden jnne souden varen licghen ighelijch in hoers selues port in ene herberghe die hem dese voerghenoemde here van arkele Lambrecht die vriese ende Rycout ofte [hore] ghewaerde boede sullen wisen ende daer inne te etene drinken slapen ende hem seluen [te] winnen ende in die herberghen te licghene wittelike ende trouwelike alse licghens recht es ende daer niet vte te varen vore die tiet dat desen voerghenoemden here van arkele Lambrechte den vriese ende Rycoude ofte horen erfghenamen of hoers ghebrake dese voerghenoemde Tvaelf dusent pont ende die scade die hem daer af comen mochte vol ende al ware betaelt Ende en gheen scepen noch raetsman van onsen porten die hier voren ghenoemt sijn en mach heme onsculdeghen met andren hine moet licghen ende leisten alse goit borghe met hem [se]luen ende met anders niemene soe wanneer dat hi ghemaent word van deser borgtocht alse hier voren ghescreven es Ende omme dat sake dat dit den here van arkele Lambrechte den vriese ende Rycoude die hier voren ghenoemt sijn ofte horen erfghenamen of hoers ghebraeke vaste ende ghestaede van ons ende van onsen nacomelinghen bliue soe hebbe wi hem dese ieghenwordeghe letteren doen beseghelen met onsen seghele Ende ghebeeden onse porten die hier voren ghenoemt sijn alse Dordrecht Middelborg Zyrixe Delf Leyden Haerlem ende alcmaer dat si dese borgtocht in al dien maniren dat hier voer sproken es met ons beseghelen metten seghelen van hoeren porten Ende wi scepenen ende raet vanden porten die hier voren dicke ghenoemt sijn gheloewen allegader dese borgtocht wittelike ende trouwelike te houdene alse goede borghen in alle den voerwaerden dat hier voren ghenoemt ende ghescreuen es van ons ende vertien alles des rechts daer wi ons mede weren mochten ieghen dese voerghenoemde borgtocht wine moesten leisten alse goede wittachteghe borghen alle dese vorwaerden in al dien maniren dat wi ghelovet hebben ende voren ghesproken es
</main>
<end>
Ende omme dat wi dit vaste ende ghestaede willen houden soe hebbe wi dese letteren doen beseghelen metten seghelen van onsen porten Dese letter waert ghegheven in ons heren iare Dusent Tveehondert ende een ende neghentich des vriendaghes na den sonnendach als men singhet Letare iherusalem
</end>