Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1292_3

<begin>
Wij Rechtre Scepene Raet Ende die ghemene porters van Dordrecht Groeten ende Maken kont Ende kenlec Alle den ghenen die desen brief sullen sien ende horen
</begin>
<main>
Dat wii biden ghemenen Rade van dordrecht hebben ghegheuen die scole van Dordrecht Ewelike jnt gasthuus Te dordrecht die sieke mede Te lauene ende haren cost mede Te doene Die nv ter wilen int gasthuus licghen ende na maels licghen sullen Ewelike Te gheduerne Doer die Minne van onser vrouwen van hemelrike Ende hier bi en sal niemen ghene scoele houden binnen der vriheit van Dordrecht sonder die vorseide scoele die wii hebben ghegheuen jnt gasthuus Te dordrecht Doer onser vrouwen ere van hemelrike
</main>
<end>
Ende Omme dat wii willen dat dese dinc ewelike vast bliue ende ghestade so hebben wii desen brief beseghelt metter port seghele van Dordrecht Ghegheuen jnt jaer ons heren m cc Tue ende Neghentich Des vriendaghes na onser vrouwen daghe Ter latere
</end>