Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1293_1

<begin>
Wi Rechtre Scepenen ende Raet vander stede van Dordrecht groeten alle die ghene die dese letteren sien sullen jof horen lesen ende maken hem dat cont ende kenleec
</begin>
<main>
Dat wi doer sbeters wille omme der stede nutscap van Dordrecht bi ghemenen rade met ghezvoerne eede daertoe ghekoren hebben haren pietren ver dybborghen sone haren thielmanne ver machtilden sone Gilijse ver hadewighen sone ende wolbrande den vriese die houder sijn van desen brieve tuschen hier ende meydach die alre naest toe comende es Dat si hiren binnen der ghemeenre stede van Dordrecht gheraden sullen bi horen eede na hoerre macht in allen saken so waers die stede te doene hevet Ende der stede renten te verhurne ende te vercopene ende die penninghe daer af tontfane ende in te nemene ende die weder vit te ghevene in der stede orbare so waer dats te doene ware ende daer af goede rekeninghe ende wittafteghe te doen alle sonnendaghe oppe dier zale ende voert van allen saken die binnen dier weken ghesciet waren voert so sullen si daertoe helpen ende wisen met al hoerre macht ende bi horen eede dat alle tvist ende pijnlichede die ghevallen mach binnen der stede van Dordrecht verbetert worde
</main>
<end>
Ende omme dat sake dat wi dit vaste ende ghestade willen houden soe hebwi hem desen brief ghegheven beseghelt met onser stede seghel Die waert ghegheven jnt jaer ons heren Dusent Tvehondert drie ende neghentich op sente symon ende yuden dach der apostle
</end>