Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1293_2

<begin>
Wij jan die keyser jan putoc Ende heine haren alards sone Scepenen in dordrecht maken cunt alle den ghenen die desen brief sullen zien of hore lesen
</begin>
<main>
dat wi ghesien hebben enen brief goed ende gaue ongheblamiert Ende binnen jaers ghescreuen wel sprekende in desen worden als hier na volghet

Wij henric ser gheraerds sone Ende gillis voren haedwien sone Scepenen in dordrecht orcunden ende kennen dat vor ons quam her ghise dukinc ende verliede dat hi sculdich es haren willeme sinen broeder Een ende vijftich pont Nuwer enghelsere ende neghen scellinghe des conincs enghelse van enghelant dese vorseide penninghe sal die vorghenoemde her ghise ghelden tote ser willems dukincs wille sijns vorseids broeders waer dat dese vorseide her ghise hare willeme sinen broeder dese vorseide penninghe niet en goude tot sinen wille als hier vorsproken es So wat coste jof scaden so die vorseide her willem omme dese vorseide penninghe dade die soude die vorseide her ghise vp rechten metten hoetstoele Ende dit heuet die vorseide her ghise ghelouet haren willeme sinen broeder vp al sijn goed dat hi heuet legghende binnen dordrecht of der buten

</main>
<end>
Jn orcunde desen brieue die ghegheuen was int jaer ons heren mccxci des sonen daghes vor sente agnieten daghe
Ende dese brief was ghegheuen int jaer ons here mcc Drie ende neghentich des sonen daghes na sente odolfs daghe vor sente jans messe
</end>