Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1293_9

<begin>
Wi jan die keiser henric haren ger[ard]s sone heine haren alards sone Ende willem vten steenhuse Scepenen in dordrecht orcunden ende kennen
</begin>
<main>
d[at] [wi] ghesien hebben eenen brif goed ende gaue ende binnen jaers ghescreuen wel sprekende van worde te worde als hier na volghet

W[i] jan putoc jan van striene gillis ser jacobs sone ende jacob ser ghiben suagher Scepenen in dordrecht orcunden ende kennen ende maken [kont] [ende] [k]ennelic alle den ghenen die desen brief sullen sien of horen Dat vor ons quam als vor scepenen her Ghise diemen heet duk[inc] [ende] [verli]ede dat hi sculdich es haren willeme dukinghe sinen broeder die houder es van desen brieue hondert pont niewer enghelsere ende seuen ende tachticht pont sconincs penninghe van enghelant Ende dese vorscreuene penninghe heuet hi ghelouet te gheldene tot des vo[r]seiden hare willems wille vp alle dat goed dat die vorseide her ghise legghende heuet binnen der port van dordrecht jof buten der port jof waer dat tgheleghen es binnen der baliuscip van zuet hollant waer dat sake dat die vorseide her willem sijnre penninghe niet langher ne mochte noch ne woude onberen Ende hi die penninghe die hier vorscreuen staen te coste ende te scaden wonne Dien cost ende dien scade sal hem die vorseide her ghise vp rechten ende ghelden metten hoeftstoele Jn orcunde desen brieue die was ghegheuen in jaer ons heren mcc ende Neghentich des saters daghes naest halfvastene

</main>
<end>
Ende desen brief was ghegheuen int jaer ons heren Tualf hondert Drie en Neghentich des wons daghes vor Sincsen seuene
</end>