Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1294_1

<begin>
Allen den ghenen die desen brief sullen sien ende horen [] Broeder steuen gardiaen vanden minder broederen in Dordrecht saluut in onsen here met kennessen der waerheit ende doe[n] v te wetene
</begin>
<main>
dat wij hebben ghesien eens hedels mans lettren heren florens sgrauen van holland beseghelt met sinen seghele ongheblameers ende wel sprekende in desen woerden

Wij Florens Graue van holland maken kont ende kenlec Alle den ghenen die desen brief sullen sien ende horen Dat wii omme den meneghen ghetrouwen dienst die onse lieue ghetrouwe portren van Dordrecht onsen vordren ende ons dicken ende menechwarf vliteleke hebben ghedaen ende altoes siin ghereit te doene so hebben wij hem verdraghen ende quite ghelaten dat men gheenre portre zout van Dordrecht sal vermeten Ende sii vrieleke ende vredeleke binnen onsen lande onvermeten varen sullen met horen Rechten tholne met zoute ende met coerne ende dat wii des vermetens van zoute Noch der coren maten Nemmermeer an hem begaren sullen te hebbene noch dat wii ons dies niet sullen anetrecken noch onderwinden Vort so hebben wii onsen vorseiden portren ghehenghet ende ghegheuen Dat sii eweleke vortwaerdmeer die ghifte vander scole in dordrecht ende vander Costerien al daer selue gheuen moghen daer sii willen ende dien siire jonnen ende al dat recht dat wii hadden jnden steeninen Thorn jeghens dat kerchof dat sceld[en] wii tote onser vorseider portre behoef vri ende quite Vort so gheorlouen wii onsen vorseiden portren van Dordrecht [so wae]r sii Erue lecghende hebben binnen hore vriheden het si op der hauenen joft after joft voren dat sii dat bet[ymmeren] [m]oghen ende hore orebare daer mede doen sonder onse scade Ende alle die vriheden ende priuilegien joft hantvasten d[ie] [onse] vors[e]ide portren van dordrecht ane onsen vordren ende ane ons witteleke ende redenleke hebben vercreghen ende ghewonnen [ende] sii bethoghen die ghelouen wii hem eweleke vast te houdene sonder arghelist ende ghestade ende vore onsen raet die daer ouer waren ende onser hogher manne een deel heren janne van arkele heren willeme van egghemonde heren diederike van wassenare Riddren ende voer anders vele goeder liede so hebben wii hem desen brief doen beseghelen met onsen seghele Dese brief was ghegheuen jn Dordrecht jnt jaer ons heren Dusentich Tuee hondert ende Neghentech te half aprille

</main>
<end>
jn orkonde desen brieue die ghescreuen was jnt jaer ons heren dusentich tuee hondert viere ende Neghentech des manen daghes in die sinx daghe
</end>