Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1294_2

<begin>
</begin>
<main>
Enen edelen here ende enen moghenden horen lieuen here mijn her Florens Graue van hollant zelant ende here van vrieslant Wij Scepenen Raetsmanne ende die ghemene steede van Dordrecht onbieden v onsen dienst ende daertoe ghereet te sijne vroe ende spade soe waer daer ghijs begharende sijt Lieue here wi bidden v allegader ghemeenlike ende oetmodelike omme onsen dienst ewelike dat ghi willem dukinghe onsen porter die met v te doene heeft alsoe ghenadelike ende vriendelike van v laet gheraken ende janne sijnen neve sher ghyzen sone dat si gheware worden dat si onser bede te bat hebben ende dit doit lieue here des bidde wi v ghemeenlike doer goeds wille ende laet v ghedenken ende aen sijt die mengherhanden ghetrouwen dienst die wilen v her ghyse ende willem sijn broeder deeden
</main>
<end>
here god die beware v zyele ende v lijf al v leuen
</end>