Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1296_1

<begin>
Wij Rechtre scepenen ende borghemeestes van Dordrecht maken kont ende kenlic alle den ghenen die desen brief sullen sien ende horen lesen
</begin>
<main>
dat wii sculdich siin vander ghemeenre stede weghen van Dordrecht janne den snidere die houdere es van desen brieue hondert pont jnghels ende ene ende viertich pont jnghels an hoedekine pennincghe die ghincghe ende gaue siin daer die viere waert of siin Neghen pennincghe Niewer hollands van desen pennincghen voerseit hebben wii hem ghelouet ende ghelouen elkes jaers te gheuene viertien pont jnghels ende tue schellincghe jnghels also lancghe als hem dese vorseide pennincghe vte staen die ene helft te gheuene alle jare te meye ende die ander helft te bamisse dat altoes daer naest coemt ende dese vorseide rente so moghen wii lossen ende quiten so waneer dat wii willen ende moghen emmer die tien pont jnghelsche omme hondert pont jnghels ende dese scout die wii janne den snidere vorseit sculdich siin dat es van alsulker scout ende van alsulker borchtucht daer die stede van dordrecht borghe of es ende daer sii hore scout of ghemaect heuet ende beseghelt es metter stede seghele van Dordrecht jeghens die goede liede van brucghe ende vanden damme Namelike jeghens heren gielise clawaerde ende jeghens siin gheselscap die daer toe behoren van sheren lambrechts vriesen weghen van sire rasterincghen ende dese vorseide voerwaerden sullen wesen behoudenlike onser stede recht jn deser manieren ware dat sake dat wii iement vinden mochten die dese vorseide scade sculdigher ware te gheldene metten rechte dan wii van onser stede weghen dat wiit an hem verhalen mochten
</main>
<end>
jn orkonde desen brieue die wii beseghelt hebben metter stede seghele van Dordrecht jn kennessen ghegheuen jnt jaer ons heren m cc sesse ende Neghentich jn clements auonde
</end>