Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1296_2

<begin>
Wij Jan van auennes Graue van henegouwen Maken kont ende kenlic alle den ghenen die desen brief sullen sien ende horen lesen
</begin>
<main>
Dat wii bi rade ons raets omme bede der goeder liede ghemeenlike van dordrecht ende omme menighen ghetrouwen dienst die sii dicke wile ghedaen hebben den heren van holland so hebben wii ghegheuen der ghemeenre stede van Dordrecht al dus ghedane ene hantveste sprekende jn deser manieren also dat sii onder hem kiesen moghen van jare te jare Neghen scepenen ende tue borghemeesters Ende die sullen bliuen een jaer al sonder of doen van jemene henne ware jof sii valsch gheprouet worden van hoers selues ghesellen ende so waneer dat jaer omme coemt so sullen die Neghen scepenen ende die tue borghemeesters kiesen bi horen ede Neghen andere scepenen ende tue borghemeesters ende die sullen bliuen een jaer jn alre manieren als hier voerscreuen staet Ende waert dat sii enighe tuiincghe onderlincghe hadden van kiesene dat sii niet wel ouer een en droeghen an welke side dats die meeste menighe viele die andere soudents hem volghen Ende emmer also voert van jare te jare hier jn te bliuene toter wilen dat jan graue van holland onse neue te lande coemt ende dese scepenen ende borghemeesters alle jare te kiesene vp sente bauen dach Ende omme dat wii die goede liede van Dordrecht nv ende menich waeruen ghetrouwe vonden hebben jn sgrauen dienste van holland so willen wii jan van auennes graue van henegouwen hem dese dinc vast ende ghestade houden van onsen weghen ende voert bidde wii vriendelike janne den graue van holland onsen neue als hi te lande coemt dat hi der stede van Dordrecht dese dinc bescriue ende ewelike vast ende ghestade houde
</main>
<end>
JN orkonde desen brieue die wii jan van auennes graue van henegouwen vorseit beseghelt hebben met onsen seghele jn kennessen ghegheuen jnt jaer ons heren mcc sesse ende Neghentich jn sente michiels daghe
</end>