Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1301_1

<begin>
wij heinric van der maze diederic van den toerne wouter van der timple ende adaem duker scepene in dordrecht oerconden ende kennen
</begin>
<main>
dat voer ons quamen ver machtelt wt den meelhuse haren willaem dukijncx dochter met haren ghecoerne monbare ende hare kinder namelike woluiaert met haren ghecoerne monbare volquin heinekijn aleborch ende willekijn met haren gheboerne voechde janne haren broder ende verghieden dat si ontfanghen hebben van willame heinemans sone van wtwike dien hi hadde bi aleborghen haren willaem dukijncx dochter tuee hondert pont ende zes pont louenscer penninghe eenen suarten tornoysen alsoe goet als nu gaet voer eenen pennijnc jof eenen groeten tornoysen des conijncx pennijnc van vrankerike die goet zilueren es voer zestien suarte tornoyse dat payment niet te arghen noch te beteren dan alsulc als heden op desen dach ghenghe ende ghaue es in dordrecht van desen voerseiden ghelde soe sullen dese voerseide ver machtelt met haren ghecoerne monbare ende hare kindere voerseit gheuen te renten alle jare willame heinemans sone voerseit tot elken sente bauen daghe tuintich pont ende tuaelf scellinghe alsulcs payments als hier voerscreuen es alse langhe als si dit voerseide ghelt onder hebben ende die eerste rente sullen si gheuen van eenen jare van sente bauen daghe die naest coemt ouer een jaer voert van deser voerscreuen rente soe sal hebben dese voerseide heineman van wtwike neghen pont jaers alsulkes payments als hier voerscreuen es alsoe langhe als hi leuet ende soe wanneer dat des voerseits heinemans niet meer en es soe sullen die neghen pont jaers voerseit comen an willame sinen sone voerseit dese voerseide penninghe ende dese voerseide rente hebben si verzekert op dat erue ghehelike daer dat meelhuus nu ten tiden op staet sonder vijf ende tuintich scellinghe jaers die daerwt gaen ende op vijf pont suarter tornoyse jaerliker renten legghende in dat erue daer colijn clawaerts soen nu ten tiden op woent die sharen willaem dukijncx sijn ende sire dochter gheleent heeft ende verghiet heeft dat bi sinen wille es ende ghebrake daeran yet dat mach willaem voerseit verhalen an dat meelhuus voert soe essertoe ghesproken waer dat sake dat willaem voerseit begheerde weder te hebben dese voerseide penninghe dat sal hi deser voerseider ver machtelden ende den kinderen voerseit doen te wetene drie maende voer dien dat jaer wtgaet ende daerbi soe sullen si hem betalen ende waer dat sake dat dese voerseide ver machtelt ende hare kindere voerseit des voerseits ghels quite wilden wesen soe sullen si desghelikes dien voerseiden willame weder doen als voerscreuen es ende alse dese voerscreuen dinghe sijn ghemaket behouden des rechts van der hantveste daer haer willaem dukijnc ende heineman van wtwike eerste bi gheeffent waren bezeghelt met der stede zeghel van dordrecht voert waer dat sake dat willaem voerseit jof sijn bode om dese voerseide rente quame tot elken termine als voerscreuen es ende men hem sijn rente niet en ghaue op den eersten dach als hi quame soe sullen ver machtelt ende haer kinder voerseit hem jof den bode sinen cost quiten in der herberghe tot dier wilen dat si hem betaelt hebben dese voerseide rente
</main>
<end>
jn oerconde desen brieue ghegheuen int jaer ons heeren m ccc ende een des saterdaghes na sente laurens daghe
</end>