Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1306_1

<begin>
wij jan van striene jan die vriese haren ghysen soene ende gheerscalc clays oems soene scepenen in dordrecht oerconden ende kennen
</begin>
<main>
dat voer ons quam oudeheyne die snidere ende verghiede dat hi vercoft heuet heinen van waes alse totes heylighen gheests behoef die eene helft van den erue daer dese oudeheyne nu vp woent van der haluer straten ter hauene toe ende hem hierof betaelt es den eersten penning ende den lesten hierbi heuet hijt hem ghelouet te waren alse een vri ghoet van allen commer ende van alrehande aentale voert soe kenne wij voerghenoemde scepenen dat dese heine van waes dit voerghenoemde half erue alse van des heilighen gheests weghen desen voerghenoemden oude heynen verhuret heuet toten naesten brande om vier ende twintich scellinghen niewer hollants sulc als men tordrecht in die munte slaet iof in paymente twee zwarte tornoysen ouer eenen hollants siaers deene helft te gheuen alle iare telken meydaghe ende die ander helft telken sente bauen daghe
</main>
<end>
jn oerconde desen brieue ghegheuen int iaer ons heeren m ccc ende sesse des dinxendaghes na sente matijs daghe
</end>