Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1307_1

<begin>
wj schepene van dordrecht maken kont allen luden
</begin>
<main>
dat wi sculdich sijn van der meenre stede van dordrecht janne alouts sone ende vriesen alouts sone die houders sijn van desen brieue ende haren maghen als van den ongheualle dat gheschiede an van jersike ende an sine brodre daer ghod die zielen of hebben moet ende tachtich pont swarter tornoyse ende hondert pont swarter tornoyse ter voersoene jn paymente eenen groeten swarten tornoysen voer sestien swarte tornoyse jof in andren paymente die waerde daerteghens voert make wi kont dat wi hem van der meenre stede weghen voerseit sculdich sijn ter rechter zoene te meeus bods maghen behoef tneghentich pont swarter tornoyse jn den voerseiden paymente voert make wi kont dat wi hem sculdich sijn ter rechter zoene te droeghe doedekijns maghen behoef viue ende twintich pont swarter tornoyse jn den voerseiden paymente dese voerseide zoene hebbe wi hem gheloeft ende ghelouen als wittachtighe liede trouwelike ende wel te betalen dat eene dordendeel te onser vrouwen daghe te middenoechste die naest koemt dat ander dordendeel binnen den vier kerstdaghen die naest komen ende dat dorde dordendeel binnen den vier paesdaghen die daerna naest komen ende die hondert pont die ter voersoene staen voerseit te betalen ten eersten daghe voerseit voert waert dat wi dese voerseide zoene niet en betaelden des ghod verbiede tote elken termine als voerscreuen es soe sulle wi scepene ende raet voerseit ghemeenlike jof soe wie dan te tiden scepene ofte raet sijn te hare maninge jof te haers ghewaerts boden ten briele daer wi dese voerseide zoene gheloeft hebben te leueren jn eene herberghe ghaen ligghen daer men ons wijst ons seluen te winnene tidighe maeltijt te houdene ende vte dier herberghe niet ghenoech ghedaen to waert dat onser eenich vieren toe ende niet dat wi vorwaerde houden met liede voer ons doen als wi sijn om dat voerseide vorwaerden wel ende wittelike houden willen
</end>