Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1310_3

<begin>
Wij pieter oudekijn jan die snider Ende willaem ossekijn scepenen in Dordrecht oerconden ende kennen
</begin>
<main>
dat Maes die backer ghehuret heuet jeghens joncvrou vrederaet van alfen der priorinne van den cloester van zenewen Dat erue daer dese maes nu vpwoent van der haluer straten afterwaerts alse varre alset te rechte ghaet Ende gheleghen es tusschen meester wouter bouwelings ende tusschen lams van maldeghems in eenre eeweliker huren hem ende sine nacomelingen vrilike ende vredelike te besittene om drie pont ghoeder hollants ende twee cappoenen siaers jof in payment twee zwarte tornoysen ouer eenen penning jof eenen ghoeden groeten coeninx tornoysen ouer acht penninghen jof in andren paymente die waerde daer jeghens Die eene helft van deser huren alle jare te betalen in sente bauen daghe Ende die ander helft in mey daghe daer naest comende waert dat men jaerlijcs dese hure niet en betaelde telken termine alset voerscreuen es soe waer dese voerghenoemde hure quite Ende hier bi mach dese maes sulke timmeringhe alse hi nu vp desen Erue heuet jof namaels ghecrighet vercoepen ende dit Erue mede verhuren jn sulker huren als hijt heuet
</main>
<end>
Jn oerconde desen brieue ghegheuen int iaer ons heeren M ccc ende tiene des manendaghes voer vutghaende meye
</end>