Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1310_5

<begin>
wij tieleman die vriese tonijs haren ghisebrechts soene ende damaes boeneuent scepenen in dordrecht oerconden ende kennen
</begin>
<main>
dat clais die ketelare ghehuret heuet jeghens joncvrou vrederaet van alfen priorinne van den cloester van zenewen dat erue daer hi nu vp woent van der haluer straten afterwaerts alse varre alset te rechte ghaet in eenre eeweliker huren hem ende sine nacomelinghen vrilike ende vredelike te besittene om vier pont ghoeder hollanscher ende twee cappoenen siaers iof in pamente twee zwarte tornoysen ouer eenen penning jof eenen groeten coeninx tornoysen oer acht penninghen jof in andren paymente die waerde daerteghens die eene helft van deser hure jaerlix te gheuene telken sente bauen daghe ende die ander helft telken meydaghe daernaest comende ende hierbi mach dese clays die ketelare sulke timmeringhe alse hi nu heuet vp desen erue jof namaels ghecrighet vercoepen jof verhuren ende dit erue mede verhuren jn sulker huren hijt heuet voert kenne wij voerghenoemde scepenen dat vrederic metten staue ghehuret heuet jeghens dese voerghenoemde priorinne dat erue daer dese vrederic nu vp woent ende gheleghen es jeghens des voerghenoemde clais ketelaers huse rechtouer van der haluer straten ter hauene toe in eenre eeweliker huren met selken voerwaerden alse dese voerseide clais die ketelare sine hure ghemaket heuet ende voerscreuen es om vier pont ghoeder hollanscher ende twee cappoenen siaers in paymente ende te tween tiden jaerlix te betalen alset voerscreuen es
</main>
<end>
jn oerconde desen brieue ghegheuen int jaer ons heeren m ccc ende tiene des manendaghes voer vutghaende meye
</end>