Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1311_2

<begin>
wij jan van striene abel heren gillis sone ende ricout van nordeloes scepene in dordrecht oerconden ende kennen
</begin>
<main>
dat voer ons quam aghate ians wedewe heren alaerds soens daer god die ziele of hebben moete met horen ghecornen mombaer ende ghelouede te gheuene voer hoer suster testament ver zegherade daer god die ziele of hebben moete den heilighen gheest in dordrecht viertien scellinghe hollants tsiaers staende neghen iaer te betaelne tote elken bamisse daer teerste payment of wesen sal te bamisse die naest coemt voert kenne omdat soe oec heeft gheloeft voer ons te gheuene tien scellinghe hollants tsiaers tote sinte martins tote vtrecht ten ghestichte neghen iaer staende ende in alre manieren als voerscreuen es als van den viertien scellinghen van den heilighen gheest ende dese voerseide rente heeft soe versekert op haer huis ende op haer erue dat soe nv ten tiden beseten heeft
</main>
<end>
jn oerconde desen brieue ghegheuen jnt jaer ons heren m ccc ende elue des saterdaghes voer sinte ians dach te midzomer
</end>