Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1313_1

<begin>
Wij jan verdiedewien sone wouter van der tympel ende heinric die vriese haren tielemans sone scepene in dordrecht orkonden ende kennen
</begin>
<main>
dat voer ons quam haer pieter oudekiin ende verghiede dat hi ghegheuen heeft den heylyghen gheest binnen dordrecht bi sinen moet wille ende machtich siins sins dat erue gheheel daer gillijs die smit aertus suagher nv ter wilen op woent welc Erue voerseyt rent drie pont goeder hollants tsiaers alse voer siins vader cruce ende voer siinre moeder cruce ende voer winin siinre suster cruce daer got die ziele of hebben moet alse waerbi so welken tiit dat ene ghemene vaert wert over zee dat die heylych gheest voerseit vt sal reken also vele ghels alse die voerseyde erue op die tiit ghilden mach desen voerseyden drien crucen hoer vaert mede te quiten
</main>
<end>
jn oerkonde desen brieue ghegheuen jnt jaer ons heren dusent drie hondert ende dortiene des saterdaghes na die pasche daghe
</end>