Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1328_1

<begin>
Wi ghise dukinc haren willaems soen ghisebrecht maleghiis haren ghisebrechts soen ian veren yden soen ende coenraed ver neesen soen Scepenen in dordrecht orkonden ende kennen
</begin>
<main>
dat voer ons quamen pieter jans honts soen Ende willaem reynier jans honts soen een clerc met sinen ghecoren voecht Ende verghieden dat si vercoft hebben haren mathise willaem ballen soens soen priester alse tote des gasthuus behoef van dordrecht twee vijftendeel lants ligghende in den tween dordendelen van den ghehelen were lants dat met heet plaetsweer Ende gheleghen es in den ambochte van tollensen tusscen gherards lande van assche ende machtelden lande ians honts wedue Ende hem hier of betaelt es die eerste penninc ende die leste hierbi soe hebben hem pieter ians honts soen voerseit dat ene vijftendeel in den heelen dordendeel van den were lants voernoemt ende willaem reynier clerc voerseit met sinen ghecoren voecht dat ander vijftendeel lants in den anderen dordendeel van den heelen were lants voernoemt gheloeft te waren alse een vri goet van allen commer ende van alrehande antalen
</main>
<end>
in orkonde desen brieue ghegheuen int iaer ons heren M CCC achte ende twintich op sinte deniis auonde
</end>