Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1345_1

<begin>
WJ Rechter Scepenen ende raed die nv ter tiit siin ende gheweest hebben Ende die porters ghemeenlike der stede van dordrecht Maken cont ende kenlic Allen luden die desen brief zien zullen jof horen lesen
</begin>
<main>
Dat wi ons ende yghelic van ons vor ons ende vor onse nacomelinghe Verbonden hebben ende verbinden Ouereenghedraghen siin ende van onser ghemeenre stede weghen gheloeft hebben ende ghelouen met goeder trouwen Waerd dat yemene van Rechtere Scepenen ende rade die nv ter tiit siin ende gheweest hebben of yement van onsen porteren Enighen last stoet jof zwarnesse op quame Roerende van zulker banninghe ende ghebode als op jan symons zone van bysanten op meester clays stuuc ende op jacob deysen zone ghedaen es Of van enighen saken die noch ghescien mochten in toecomenden tiden die bi den ghemeenen gheselscape van rechtere scepenen ende rade die nv siin ende gheweest hebben Ouereenghedraghen waren ofte worden Dat wi dien daer of gheheelic ende al ontheffen zullen ende scadeloes houden ende dat helpen draghen Ende zullen mallic andren trouweliken daer in te helpe comen
</main>
<end>
Jn orkonde desen brieue beseghelt metten groten zeghel Onser ghemeenre stede van dordrecht wthanghende Ende om die meerre zekerheit Soe hebbe wi jan die verwer pieter riemmakers sone Heinric katelinen zone Tater pieters sone die vleeschouwer Aernoud arnoud ver truden soens zone Heine arnouds zone Pieter aechten sone Jan van wiic Vrederic van ameronghen Didderic heren Jan veren yden zoens sone Gheeraed van orsoyen Gheeraed hamert lisen sone Berte haren roelofs sone Ghisebrecht haren ghisebrechts haren jacobs zoens zone Willaem van essche gilliis zone Jan reymboud zeebaers zone Wouter meynen zone Beudiin beudiin meester zone Ghisebrecht ghisebrechts zone per totum [R] pieters zone Tielman die vriese haren heinric poppen zone Clawaerd sizariis sone gheeraed oueracker ghise scoentop Gilliis haren gilliis zone Willaem van brederode Daniel van tolleysen Tielman oem heren jan oems sone Willaem camerlinc Reynoud haren jacobs zone Gheeraed witte heinric mombaers sone Pieter sijn broeder Tielman die hont haren florens zone van den zwaerde Liebrecht vaec Willaem [aliniers] zone jan van steenberghen Elewoud willaems zone ende jacob boudiins sone Alle ghemeenlic ende yghelic van ons gheloeft ende ghelouen vor ons ende vor onse nacomelinghe Alle die zaken die hier vorscreuen siin wel ende ghetrouwelike te houden bi onser trouwe ende zekerhede ende hebben onze seghelen j n kennessen an desen brieue ghehanghen metten zeghel onser ghemeenre stede vorseit wthanghende Ende waer dat zake dat enich zeghel brake [] of vele an desen brieue van enighen persoen van ons allen vornoemt Soe willen wi dat nochtan dese ieghenwordighe brief vaste ende ghestade bliue ende wel ghehouden Jn alle sijn macht ende vormen als vorscreuen es gheliker wijs oft hi wel beseghelt ware Ghegheuen jnt jaer ons heeren M CCC viue ende viertich viertich
</end>