Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1345_3

<begin>
WJ Clays lompe didderix soen gheeraed hamert hughen soen Ende laurens eelants soen Scepenen in dordrecht orkonden ende kennen
</begin>
<main>
dat voer ons quam Willaem willaems soen vter scute ende verghiede dat hi vercoft heeft haren heinric prijs priester die houder es van desen brieue achtien scellinghe hollantsche jaerliker renten leggende jnden erue daer haer goedscalc die hont op plach te wonen an die poertside tusschen den erue daer gheeraed witte haren heinrix soen op woende in sinen lesten liue an deen zide Ende den erue daer Meeus willaem aelbaerijs soens sone nv ter wilen op woent an dander zide Ende zeuentien penninghe hollansche tsiaers leggende in den erue daer meester pieter die riemaker op woende in sinen lesten liue an die poertside westwaert alre naest den erue daer jonghe harman vinke nv ter wilen op woent Ende hem haer heinric prijs voerghenoemt hier of betaelt heeft den eersten penninc ende den lesten Hier bi heeft hi hem dese voerscreuen jaerlike renten gheloeft te waren alse een vry goed van allen commer ende van alrehande antalen
</main>
<end>
Jn orkonde desen brieue Ghegheuen jnt jaer ons heeren M ccc viue ende viertich Des saterdaghes na sinte valentiins dach in zille
</end>