Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1355_1

<begin>
WI abel van bysanten ghisebrechts sone Jan m[a]ddiin alaerds sone Tielman die hont haren florens sone van den zwaerde ende vrederic van ameronghen vrederix sone Scepenen jn dordrecht Orconden ende kennen
</begin>
<main>
Dat vor ons quam jan lauwen sone wt streuelant ende verghiede dat hi vercoft heeft Clayse haren heinrix scoutaten sone Die houder es van desen brieue Tien marghen lands gheleghen binnen den ambocht van streeflant tusschen kerstinen jan nellen soens weduen lande an die een zide ende den lande dat badeloghe gheeraed jacobs soens wedue Daer nv ter wilen legghende heeft an die ander zide Ende hem hierof betaelt es die eerste penninc ende die leste hierbi so heeft hi hem Dese tien marghen lands vornoemt gheloeft te waren alse een vri goed van allen commer ende van allen antalen Ende hierof zo hebben hughe die vryese ende jan heinric willaems soens sone vor ons ghetuucht met horen eede ten heylighen Dat die rechter binnen den vorseiden ambochte ouer die ghifte van desen tien marghen lands vorscreuen niet staen en woudde Voerd kennen wi Dat jan lauwen sone vornoemt Dese tien marghen lands vorscreuen weder van den vorseiden Clayse heren heinrix scoutaten sone jn eenre eeweliker huren ontfaen heeft Om Ses pont hollantsche elx jaers jn manieren dat jan lauwen sone vorseit Dit vorscreuen lant wel verwaren ende vri houden zal alse eyghen lant van dikinghe ende van anders allen coste ende oncoste diere op es jofte jn eenigher manieren opcomen mach Op ziins zelfs coste ende zorghe Onuermindert van den jaerliken pachte vorscreuen Dese voernoemde hure alle jare naest comende te betalen ende binnen der stede van dordrecht te leueren Op onser vrouwen dach ter lichter Daer die eerste betalinghe of wesen zal van onser vrouwen daghe ter lichter naest comende ouer een jaer jn alsulken paeymente alse bi tiden binnen der stede van dordrecht ghenghe ende ghaue siin zal Ende waerd dat zake Dat jan lauwen sone vornoemt Dese tien marghen lands vorscreuen niet wel en verwaerde jof dat hi den pacht daerof jaerlix niet en betaelde also ende jn alre manieren alst vorseit es So ware die hure vorseit quite ende Clays heren heinrix scoutaten sone vornoemt mochte dan rechtevort vrilic sinen wille doen met desen tien marghen lands vorscreuen alse met anders sinen vri eyghenen goede Ende waerd dat an eenich van desen vorwaerden ende gheloeften vorscreuen yet ghebrake So es des borghe Coenraed badeloghen sone wt streeflant Dat wel te voldoen als een goed borghe Ende hierof zo heeft jan lauwen sone vorseit Den voernoem[den] [coen]rade badeloghen sone gheloeft te ontheffen ende scadeloes te houden
</main>
<end>
Jn orconde desen brieue ghegheuen jnt [jaer] ons heren M ccc viue ende vijftich Des vridaghes na sinte ponciaens dach
</end>