Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1367_1

<begin>
WJ Rechter scepen ende Raet ende die ghemeyn stede van dordrecht Doen Cont allen luden
</begin>
<main>
dat wij metten goeden luden onser porters vander viscopers gilde in dordrecht om ghemeyn noet orbaer ende m ghebreck dat die stede voertijds in alrehande beleyt ghehadt heeft ende om te scuden onraet inder stede ende die meeste Ruste voert te setten tot ons rechs lands heeren behoef ende die stede van dordrecht in beteren punten te brenghen van neringhen ende van rechten met malcanderen ouer een ghedraghen sijn dat wi in coren hebben gheleyt alsulke puynten als hierna ghescreuen staen Jnden yersten dat een yeghelijc van hem die stalle heeft aen die visschemerct dat hi die mach vercopen wanneer hijs bi kenliker noet saec te doen heeft ende so wie van hem storuen bi tiden dat sijn stalle comen mach op sijn naeste recht erfghenamen om dartien scellinghe groet tornoyse der stede van dordrecht daer af te gheuen Voert en sal nyment vissche vercopen noch viscopers neringhe hantieren [hine] sal poerter wesen ende van goeder faem ende ghestalt ende in dat gilde ontsien worden [ende] [hi] [sal] [dat] [ambacht] [] ende neringhe stadeliken hantieren sonder arghelist ende so wye daer ouer dede als voer enich van desen puynten voerscreuen dat is op een boet van tien ponden ende sijn poert recht ende waerd dat daer ghemeynre steden oft yement van desen gilde voerscreuen om deser saken enighen stoet of swaernisse quame des sullen wi trouwelike bi malcanderen bliuen dien onraet te wederstaen behoudeliken altoes ons liefs heeren sijnre heerlijcheyt ende sijns rechs ende der stede van dordrecht haers rechs
</main>
<end>
ende om dat wy dit wel ende ghetruwelijc willen hebben ghehouden ende meynden te houden so hebben wy onser stede zeghel aen desen brief ghehanghen in vestenissen der dinghen Jnt Jaer ons heeren dusent drie hondert seuen ende tsestich op sinte gi[el]ijs dach
</end>