Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1367_2

<begin>
WJ Rechter scepenen ende Raed ende die ghemeene stede van dordrecht Doen cont allen luden
</begin>
<main>
dat wi met ghaders des ghemeenen ambochten onser poerteren in dordrecht van dien neringhen die hier na ghescreuen staen Dats te wetene Scherers met der drogher schare ende baerdemakers die onder een ambocht te zamen ghenoemt ziin omme ghemeenen noot orbaer ende nutsscep ende om ghebrec dat die stede vortiits in alrehande beleede ghehadt heeft Ende omme te schuwen onraed in der stede Ende die meeste ruste ende profijt voert te setten tot ons gherechts lantsheeren behoef ende die stede van dordrecht in beteren poynten te bringhen van neringhen ende van rechte Met mallic anderen ouer eenghedraghen siin dat wi hem gratien hebben ghegheuen ende in coren gheleyt alsulke poynten als hier na ghescreuen staen Jn den Eersten dat nyement wie hi si die gheen poorter noch in hoer ghilde niet en is wercken en mach binnen der stede vriheit van dordrecht alse meesterye van eenich deser vornoemder ambochten te hantyeren hi en si poorter in dordrecht Ende hine hebbe des ghilden ghemoede daert werc of roert noch oec in knaepscep hine hadde des ghilden ghemoede daert an roert so wie daer ouer dede dats op een pene van tyen ponden ende siin portrecht Voerd dat nyement in eenich deser ghilden of ambochten en zal worden ontfanghen hine si wercman van dien ambochte Ende hi sal dat ambocht stadeliken hantyeren optie zelue vorscreuen pene Ende alle zaken vorscreuen zonder archlist Ende waer dat zake dat der ghemeenre stede of onser eenich om dese zake last of zwaernesse op quame des zullen wi trouwelic bi mallic anderen bliuen dien onraed te weder stane behoudelic altoes onsen lieuen heere siinre heerlicheit siins rechts ende der stede van dordrecht hoers rechts
</main>
<end>
Ende om dat wi dit wel ende trouwelic willen hebben ghehouden ende meenen te houden Soe hebben wi onser stede zeghel van dordrecht an desen brieue ghehanghen jn vestenisse deser dinghen jnt jaer ons heeren M ccc zeuen ende tsestich Op sinte gillijs dach
</end>