Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1367_3

<begin>
Jn den name ende in der eeren van ons liefs heeren ihesu cristi Wi ghiltbroeders ende alle die ghesellen ende werclude ghemeenlic ende bisonder van den wollen weuers ende volres jn dordrecht Doen cont ende openbaer met kennissen der waerheit
</begin>
<main>
[] [] ons anders alle die gilden in dordrecht ghemeenlic als vleeschouwers vischcopers Sciplude houtcopers van sinte nyclays ghilde huustymmerlude Cupers Scrinemakers [d]dehouwers Sciptymmerlude backers [b]brouw ersslude ysersmede wantsniders nyen cleedermakers Oudecleedermakers Siluersmede Ryemakers potgh[ieters] beeldemakers glasemakers Maetsenaers tegheldeckers nyen schoemakers Outschoemakers platinemakers Scherers Ryeddeckers leemers hantschoemakers [s]semakers taschmakers zaghers knapen van den Wiin ambochte Ramers varwers wollecopers bontwerkers linnenweuers appelcopers mandemakers ende moelnaers gheloeft te hebben te helpen houden zulke vriheit ende alsulke koren als tot onsen ambochten behorende siin ende wi met den rechte van ouden haercomen ghebruuct ende ghehadt moghen hebben onuermindert sonder archlist Dat wi dien zeluen ghilden vornoemt ende elken van horen ghildebroeder bisonder gheloeft hebben in goeden trouwen ende ghelouen met ghesamenderhant ende elc vor al ende hebben hem ghesekert ende ghezworen ghetroulic bi te staen ende bi hem te bliuen te leuen ende te steruen ende om nyements wille of te gane noch te bezwiken jn manieren dat wi altoes [zamelt] bliuen zullen bi onsen rechten lantsheer ende bi onser stede recht van dordrecht na allen den inhouden van der stede hantuesten die si nv heeft iofte namaels vercrighen [mach] als goede wittachtighe lude sonder wedersegghen alle archlist ofgheset Voert dat wi hem zullen helpen houden zulke priuilegien ende vriheden als hem die stede ghegheuen ende in koren gheleit heeft jn allen manieren als hoer brieue begripen die si daerof hebben onder der stede zeghel waer oec dat sake dat yement van hem luden siin hantueste die hi van der stede heeft verlor of dat si bi ongheual te broken of te niete ghemaect worde zo souden wi na onsen vermoghen daertoe ghehulpich wesen ende bereet hem een ander alsulke hantueste weder an die stede te verweruen beseghelt met der stede zeghel Oec mede zo ghelouen wi hem ende zekeren Dat wi met hem ende ghelike hem altoes ghehouden zullen bliuen te ghelden allen cost ende oncost dien si bi tiden ten ghilden orbaer ghemeenlic Doen zullen het si met waken met heeruaerden met reysen met schote met lote ende met anders in allen zaken die si bi tiden ouer een draghen ende behoeuen [] sonder yet daer jeghens te zegghen of te doene
</main>
<end>
Ende want wi hem alle dese poynten vorghenoemt vaste ende stade meenen te houden ghetroulic sonder [] tot eeweliken daghen So hebben wi hem desen brief ghegheuen open beseghelt met ons ghemeens ghilts zeghel jn vestenessen deser zaken Jnt jaer ons heeren M ccc zeuen ende tsestich Des woensdaghes na sinte matheeus dach
</end>