Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1367_4

<begin>
WJ Rechter scepenen ende Raed ende die ghemeene stede van dordrecht Doen cont allen luden
</begin>
<main>
dat wi met ghaders den ghemeenen ambochten onser poerteren in dordrecht van dien neringhen die hier na ghescreuen staen Dats te wetene ziluersmede ryemakers potghieters beeldemakers ende glasemakers die onder een ambocht te zamen ghenoemt ziin Omme ghemeenen noot orbaer ende nutsscap Ende om ghebrec dat die stede vortiits in alrehande beleede ghehadt heeft Ende om te scuwen onraedt in der stede ende die meeste ruste ende profiit voert te zetten tot ons gherechts lantsheeren behoef ende die stede van dordrecht in beteren poynten te brenghen van neringhen ende van rechte Met mallic anderen ouer een ghedraghen ziin Dat wi hem in gracien hebben ghegheuen ende in coren gheleyt alsulke poynten als hierna ghescreuen staen jn den eersten dat nyement wie hi si die gheen poerter noch in hoer ghilde niet en is werken en mach binnen der stede vriheit van dordrecht alse meesterye van eenich deser vornoemder ambochten te hantyeren hi en si poerter in dordrecht Ende hine hebbe des ghilden ghemoede daert twerc of roert noch oec in knaepscap hine hadde des ghilden ghemoede daert an roert Soe wie daer ouer dede Dats op een pene ende boete van tyen ponden ende tportrecht Voert dat nyement jn eenich deser ghilden of ambochten en zal worden ontfanghen hine si wercman van dien ambochte Ende hine zal dat ambocht stadeliken hantyeren op die boete ende pene also vorscreuen es Ende alle zaken zonder arghelist Ende waer dat zake dat der ghemeenre stede of onser eenich om dese zake last of zwaernesse op quame Des zullen wi trouwelic bi mallic anderen bliuen die onraet te weder stane behoudelic altoes onsen lieuen heere siinre heerlicheit siins rechts ende der stede van dordrecht hoers rechts
</main>
<end>
Ende om dat wi dit wel ende trouwelic willen hebben ghehouden ende meenen te houden so hebben wi onser stede zeghel van dordrecht aen desen brieue ghehanghen jn vestenisse deser dinghen Jnt jaer ons heeren M ccc zeuen ende tsestich op sinte gillijs dach
</end>