Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1386_1

<begin>
WJ Dekens ende ghemeene Ghildebroeders van den tymmerluden in dordrecht Doen Cond ende kenlic Allen luden
</begin>
<main>
Dat wij by ghemeenre eendracht ende goeden moetwille van ons allen verdraghen sijn ende gheraemt hebben ende in kueren gheleyt alsulke punten ende kueren als by perticlen hierna volghen ende ghescreuen staen Dats te weten dat een yghelic ghildebroeder die bi [tiden] is Elken weke gheuen zal vier penninghe hollants den deken in den bussen te doene ende met dien ghelde [z]almen elken ghildebroeder also verre als hi den ghilde ghenoech ghedaen heeft te hulpen comen in siinre siecten of in siinre quetsinghen met twee wit groten tsdaghes durende also langhe als hi siec leyt after dien dach drie daghe gheleghen heeft dat weecghelt oec te meeren [] biden ghemeenen ghildebroeders vorscreuen oec en sal een yghelic dat in sijnre siecten niet moghen weder zegghen vort en zalmen gheenen ghildebroeder dat weecghelt gheuen [] ten ware dathi die quetsinghe vercreghen hadde op werckedaghe ende van wercke roerende jof in diensten ons liefs heeren van holland jof der stede van dordrecht vort en zal nyement wercken op daghen die die heylighe kercke ghebiet te vieren ten deden nootsaken of dathi hem zeluen tymmerde op een half pont was of drie grote daer voren rechte vort te gheuen of sijn ambocht niet te doen hi en hadderof voldaen jtem wanneer eenich ghildebroeder sterft of sijn wijf soe zal daer een yghelic ghildebroeder die binnen der stede es comen ter opheuen ende daer bi bliuen ter tijt toe dathi begrauen is op die boete van eenen haluen pond was of drie grote daervoren rechte vort te gheuen eer hi zijn ambocht doen zal alsoe verre als hijs een wete heeft hi en macht met sinne keeren maer storue enichs ghildebroeders kint daer soude des ghelijcs elc ghildebroeder comen ter opheuen ende aldaer in der zeluer vormen bliuen ende optie zelue boete Jtem soe wanneer die dekens marghen sprake legghen ende ghebieden na ghewoenten met horen zekeren bode tot soe wat tiden het si soe zal daer elc ghildebroeder comen ende aldaer bliuen tot der tijt toe dat die marghen sprake ghedaen is alsoe verre alsment hem te weten laet an hem zeluen jof tot sinen huus optie boete van twee groten maer waert des god verhoeden moet dathem meeren last an viele soe zoude elc ghildebroeder verbonden wesen te comen biden dekens mids der zeluer wete an hem ghedaen of tot sinen huse ende daer bi te bliuen des hem die dekens orlof ghedaen op sijn ambocht jtem waer tsake dat eenich ghildebroeder bruloft hadde jof eenich dading van zoendinghe te houden binnen der stede van dordrecht ende hijs sinen ghildebroeders in tijts vermaende daer bi te wesen soe conden si met hem gaen ende bi hem wesen optie boete van eenen haluen ponden was of drie grote hier voren als vorseit is Mer waert dat hine buten der stede vermaende met hem te wesen hem zeluen aengaende op heilich daghen datmen beryden beuaren of begaen mochte metter vloet wt ende metter ebbe weder in of metter ebben wt ende metter vloet weder in des zoude elc willich wesen te doen op die boete van eenen ponde was ten ware mids zonderlinghen last sijnre vrienden of dat hiit zelue met sinne keeren mochte jtem salmen alle jare die dekens kyesen biden ghemeenen ghildebroeders na der meesterk ore Voerd en sal gheen ghildebroeder wercken daer den anderen ghildebroeder sijn ghelt an tafter staet op sijn ghilde alsoe verre als hijt hem die daer werct te weten doet met eenen deken alsoe dicke als hi tenden dier wete aldaer wrochte ende daer toe [] die wete te doene zal yeghelic deken moeten bereet sijn wanneer hijs vermaent wordt Ende een tymmerman die wercm[a] ende niet en voldede dat waer optie zelue boete van sinen ambocht mids der wete die die deken daerof doen zoude ende den anderen daer of niet vol en gheschiede dat kenliken ware Ende soe wie in enich der poynten vorscreuen sijn ambocht verboerde dat zoude hi weder moghen lossen ende vrien om vier pont hollants die te gheuen eer hi sijn ambocht weder mochte hantyeren ende daer of ofte van eenighen boeten die vorscreuen staen en zal nyement bede doen om verdrach daer of te hebben vord en salmen nyement ontfaen in desen ghilde ten si biden ghemeenen ghildebroeders Des sal eens meesters kint dit ambocht hantierende onze ghilde moghen crighen ende daerjn bevrijt wesen omme vijf scellinghe grote of een jaer lanc daer voren om te ghane na ghewoente ons ghilden vorseit Oec sal een jngheboren poorter dit ambocht hantyerende in onsen ghilde moghen comen om een pont grote payments als ghenghe ende gaue is Ende die binnen ons liefs heeren lande gheboren is ende poerter wort dit ambocht oec hantyerende zalre bij moghen comen ende bevrijt wesen om twee grote des zelfs payments maer een poorter van buten ons liefs heeren lande gheboren zoude [in] onsen ghilde comen om vier pont grote payments vorscreuen die dit ambocht hantiert als vorseit is Ende dit ghelt als van den jncomen zal elc gheuen eer hi werken sal vord en zullen gheen waghenmakers noch borthouwers eenighe cnapen te wercken zetten hi en zal tsgylden ghemoede daer of hebben ghelike den huustymmerluden Ende soe wat ghildebroeder den anderen hiet lyeghen jof arghewoerden gaue binnen [] marghen sprake die verboerde een pont was of [] grote daer voren te gheuen eer hi wercken zoude behoudelic oec altoes onser brieuen die wi hebben onder die zeghelen ons liefs heeren sgrauen van hollant ende der stede van dordrecht wel bezeghelt Die te bliuen in hore volre macht Ende alle saken ten goeden verstane ende zonder begrijp oft arghenlist
</main>
<end>
Ende om dat wi willen dat alle dese poynten goed vast ende ghestade zullen bliuen ende ghehouden worden zonder verbreken van ons ende onsen ghildebroederen die bi tiden wesen zullen Soe hebben wi den zeghel van onsen ghemeen ghilde ende ambocht vorscreuen hier an ghehanghen jn kennessen ende ghetughe der waerheit dat was ghedaen op sinte agnieten dach jnt jaer ons heeren dusent driehondert zesse ende tachtentich Ende soe wat ghestille dese vornoemde ghildebroeders onderlinghe hadden dat souden die dekens die daer waren [] wech bringhen ende soenen ten ware van quetsinghen
</end>