Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1387_1

<begin>
WJ Jan maddiin alaerds sone willem boomghaerd willems sone willem van der tympel heren florens zone ende Jacob ysereel heren tyelman ooms zone Scepenen in dordrecht orconden ende kennen
</begin>
<main>
Dat vor ons quamen mary heren euerders weduwe met eenen ghecoren voecht ende hughe boeye haer zone Ende gauen opTyelman van Breederoden den wantsnyder alle die macht ende den eyghendom van den brieuen die dorsteken siin met desen brieue tot sinen vrien eyghendom alse tot drie ponden hollantschen toe jaerliker renten staende op zeuen marghen lants alsmen ons zeyt die toe behoren gheeraed willems zone wt den ambochte van blaskiins graue ende die int zelue ambocht gheleghen siin tusschen reynoud Jan minneboden soene lande op deene zide ende witte dirx zoens lande op dander zide Voert zo hebben mary ende hughe boeye haer zone also alssi vornoemt staen met ghesamender hant ende onghescheiden vor ons gheloeft den vornoemden tyelman van breederoden die houder es van desen brieue die drie pont hollants jaerliker renten staende op die zeuen marghen lants Jn allen manieren als vorscreuen staet te waren ende [te] [vrien] als een vri goed van allen commer ende van allen antalen hier of hebben heinric zasse coliins zone ende die vornoemde gheeraed willems sone vor ons ghetuucht op horen eed ten heilighen dat die rechter ende die heemraders in den ambochte van blaskiins graue voernoemt ouer die ghifte stonden van den drie ponden hollantschen staende op die zeuen marghen lants vorscreuen ende den eyghendom daer of vry kenneden ende dat die opdracht ende coop daerof nv in zondaghe op den beloken paesschen lest leden dat was die viertiende dach in aprille ghecondicht wart int openbaer onder der hoechmissen in der kercken binnen den zeluen ambochte van blaskiins graue vornoemt
</main>
<end>
Jn orconde desen brieue ghegheuen jnt jaer ons heeren M ccc zeuen ende tachtich op den zestienden dach der maent van aprille
</end>