Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1387_2

<begin>
WJ heinric zas ghisebrechts sone Gheeraed van der haey heren jacobs sone ende sarijs clawaerts sone Scepenen in dordrecht orconden ende kennen
</begin>
<main>
Dat vor ons quam willem arnt liedelden soens sone Ende verghiede dat hi vercoft heeft pieter den haze jan pieters soens sone des boghemakers die houder is van desen brieue Een pont hollants jaerliker renten met horen afterstellighen renten van zes jaren daer die leste termiin of verschenen was te bamisse nv lest vorleden die gheleghen siin in den erue an die lantside opten oosteren hoec van die zwindrechts strate daer die vorseide willem arnts sone nv op woent Ende hem hier of betaelt is die eerste penninc ende die leste hierbi heeft hi hem dit pont hollants jaerliker renten met horen afterstellighen renten van zes jaren vorscreuen gheloeft tewaren als een vri goed van allen commer ende van allen antalen Ende waert dat hiera ne yet ghebrake so is des borghe Gheeraed jan aernts soens sone die backer dat wel te voldoen als een goed borghe ende hier of heeft willem aernts sone vorseit sinen vornoemden borghe gheloeft wel te quiten ende scadeloes te houde[n]
</main>
<end>
jn orconde desen brieue ghegheuen jnt jaer ons heeren M ccc zeuen ende tachtich opten twintichsten dach der maent van maerte
</end>