Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1388_1

<begin>
Wj willaem die moelnaer van akersloet Godeuaert van steenbrughen haeren tielmans soen Ende gheraed vander haye haren jacobs soen Scepenen in dordrecht orkonden ende kennen
</begin>
<main>
dat pieter die hase jan pieters soens sone verboden heeft met allen recht Jnt jaerghedinghe dat men bezat des woensdaghes na beloken paeschen opten achtsten dach der maent van aprille Jnt jaer ons heren M ccc acht ende tachtich een pont hollansche jaerlixscher Renten met zes jaer achterstalligher renten alsoe die brief inhout die doorsteken is met desen brieue Voert kenne wi dat willaem aernt liedelden soen daer vut ghebannen is met enen verdeban Ende pieter die hase voerscreuen daer Jn met allen Rechte
</main>
<end>
In orkonde desen brieue Ghegheuen Jnt jaer ende opten dach voerscreuen hugo joflor
</end>