Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1393_1

<begin>
WJ heinric sasse ghisebrechts soen jacop lisse harmans soen van collen Ende willem vander tympel florens soen ende Claes moelnaer jans soen Scepene jn dordrecht Orconden ende kennen
</begin>
<main>
Dat vor ons quam Claes jan pouwels soens soen ende verghiede dat hi vercoft heeft jan gheenman phreest soen die houder es van desen brieue Een half weder lands gheleghen jnden ambocht vanden crws tusschen heyn tolnaers lande an deen zide ende ghise dirx soens lande an dander zide Ende hem hier of betaelt es die eerste pennync ende die leste hier bi soe heeft hi hem dit voerseyde half weder lands gheloeft te waren als een vry goet van allen commer ende an talen sonder van sheeren pacht hier of hebben voer ons ghetughet op horen eet pieter heinrix soen ende jacop dirx soen alse heemraders binnen den ambocht voernoemt dat si met den rechter ende anders den heemraders aldaer ouer die ghifte van desen lande alsoe alst vorscreuen es stonden ende den eyghen daer of vry kenden
</main>
<end>
Ende dat ghecondicht wardt des sonnendaghes nae sente martijns dach translacio lest voerleden jnt openbaer jnder hoechmissen binnen der kercken jnden seluen ambocht vorscreuen jn orconde desen brieue ghegheuen jnt jaer ons heeren M CCC Drie ende tneghentich Des sonnendaghes nae sente jacops dach
</end>