Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1399_1

<begin>
Wj pieter pieters sone godscalc heren gilliis sone jan heren martijns sone Ende jan van haerssen heinrix sone Scepenen in dordrecht Orconden ende kennen
</begin>
<main>
dat vor ons quam pieter gheemans sone wt gheemans [poke] Ende verghiede dat hi vercoft heeft scildman jacops sone die houder es van desen brieue een vierendeel van acht marghen ende vier hont lands gheleghen in zwindrecht in heren jans ambochte van rosendael met zulken husinghe ende tymmeringhen alser nv ter tijt toe behoert ende jan aernt sone van scoenhout itoe te behoeren plaghen in sinen lesten liue tusschen jan jans soens lande optie oest zide ende den lande dat willem aernt lycle soens sone daer legghende hadde in sinen lesten liue optie west zide Ende hem hier of betaelt es die eerste penninc ende die lesten hier by zo heeft hy hem dit vorscreuen vierendeel vanden acht marghen ende vier hont lands met alle horen toebehoeren in alle manieren als vorscreuen staet ghelooft te waren als een vry goet van allen commer ende van allen antalen hier of hebben vor ons ghetuucht op horen eet pieter vastraets sone ende aernt gillijs sone als heemraders dat die rechter met anders den heemradren ouer die ghifte van desen vorscreuen lande met alle sinen toebehoeren stonden ende den eyghendom daer of vry kenneden Ende dat die coep daer of al daer inden ambochte vorseit int openbaer inder kercken onder der hoemissen ghecondicht wart des sondaghes na mey dach nv lest leden Ende waerd dat hier an yet ghebrake zo sijn des borghen willem gheemans sone ende jan gheemans sone ghebroeders dit wel te voldoen als goede borghen ende hier of heeft pieter gheemans sone siin vorscreuen borghen ghelooft wel te quiten ende scadeloes te houden
</main>
<end>
Jn Orconde desen brieue ghegheuen jnt jaer ons heeren M ccc neghen ende tneghentich opten derden dach der maent van junio
</end>