Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1408_1

<begin>
Int jaer achte op sinte Thomaesdach was bevolen hierin te teykenen biden borgemeesters vanden XXIIII ende vanden achten dit nagescreven verticht aldus inhoudende van woerde te woerde
</begin>
<main>
In dese manieren sijn verteghen van Ghijsbr Ottenz doot jonfrou Alijt des vorsz Ghijsbr wedue bi horen gecoren voecht ende bi horen vrienden op deen zyde ende des vorsz Aliden kijnderen die si hadde bi Ghijsbr vorn horen man nameliken Adriaen ende jonfrou Machtelt bi horen geboren voecht ende ghemeenen vrienden ende bider stede hant op dander zyde
Eerst is jonfrou Alijt vorsz gebleven aen tgeheel huus daer Gher vander Haeye hoer vader in woende in sinen lesten live staende aen die lantzide bider Nyewerbrugghe op die havenzide Item aen dat sthenen huus met sinen toebehoren staende in Stegeoversloet dat Ghijsbr Ottenz vorsz aldaer van nieus dede maken Item sijn Adriaen ende jonfrou Machtelt sijn zuster vorn tsamen ghebleven aen die gheheel husinge daer Ghijsbr Ottenz hoer vader in woende in sinen lesten live met anders allen horen toebehoren van voren tot after totter stede muere ende erve toe dats te weten metten sthenen toern daeraffter staende ende metten drien houten husen voren aen die Hogestrate met horen toebehoren totter tolhuse toe ende voert met alle den husinge ende kameren in Vrankenstraetke soe si Ghijsbr vorsz toebehoerde in sinen lesten live behoudelic dat jonfrou Alijt vorsz dat huus daer si nu in woent mitten tuun daerafter ende mitten toern selve bewonen mach alsoe verre als si wille sonder huere daerof te gheven ende sonder voert te verhueren twee jaer lange nadat enich van haren kijnderen vorsz hiliken sullen Des sal si die husinge in reke houden daer si in woent ende alle oncoste betalen tsi van lanthuer of anders op horen coste so lange als si dus sonder huere daerin wonen sal
Voert waert sake dat Adriaen en jonfrou Machtelt sijn suster oflivich werden sonder wittachtighe blikende geboerte after hem te laten eer jonfrou Alijt hoer moeder soe soude die een helfte van alle die husinge daer si voren aen gebleven ende op bedeelt sijn weder comen aen jonfrou Alide hare moeder ende des soude weder die helfte van beide husinge daer jonfrou Alijt vorsz voren op bedeelt ende aen gebleven is dan rechtevoert daertegens comen ende erven op der vorsz kijnderen rechten erfnamen
Voert so sijn jonfrou Alijt vorsz op deen zide ende hoer kijnderen vorsz tsamen op dander ziden gebleven elx van beiden ziden aen die een helfte van anders alle guede roerende ende onroerende waer si gelegen sijn dats te weten lant erve husingen ende renten die Ghijsbr vorsz toebehoerde in sinen lesten live ende voert elx aen deen helftc van alre imboele juwele gelde ende facelmente die Ghijsbr vorsz after hem liete in sinen lesten live ende die si wech hebben ende elx aen deen helfte van alre inscult ende uutscult diemen Ghijsbr vorn sculdich blief ende die hi weder sculdich was in sinen lesten live ende vander uutscult vorscr hebben si malcanderen van eenre helfte gelooft wel te quiten ende scadeloes te houden
Voert sijnt vorwaerden dat die brieven vanden hilixe vorwaerden tusschen Ghijsbr vorn en jonfrou Alide sinen wive vorscr ende alle vorwaerden daerof alinge ende alle quite ende te niete wesen sullen behouwelic waert sake dat Adriaen ende jonfrou Machtelt vorn storven eer jonfrou Alijt hoer moeder sonder wittachtighe blikende geboerte after hem te laten dat dan van dien tijt voert alsoe lange als jonfrou Alijt vorsz leven sal die hilixe brieven vorscr in hore machten bliven sullen mer des sullen dan alle voerleden jaren ende termine quijt wesen ende daerof en souden der vorsc kijnderen erfnamen gheenen schade liden
Item sijnt vorwaerden dat elx sijn gueden aen beiden ziden in gueden reke houden sal als daertoe behoert die een gelike den anderen ter gueder wijs sonder argelist ende soe wie van beiden ziden vorn des niet en dede ende daerof bevelinge hadde vander stede daer soude dieghene vander ander zide sijn handen aen mogen slaen ende doen daermede als met anders sinen eyghen guede sonder argelist
Voert sijnt vorwaerden dat Barnier Ghijsbr vorsc bastertszoen bliven sal aen sijn testament vanden huse op die Appelmarct op die havenzide naest den huse daer Stoyse die marsman in woent behoudelic jof Barnier storve sonder wittachtighe blikende geboerte after hem te laten dat dan die een helfte vanden huse vorscr weder comen sal aen Ghijsbr kijnderen vorscr of horen rechten erfnamen ende dander helfte aen jonfrou Aliden of aen horen rechten erfnamen
</main>

##

<end>
</end>