Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1408_2

<begin>
Int jaer vorsz wart dese nagescreven hilixe vorwaerde hierin bevolen te teykenen biden raet inder camer aldus inhoudende van woerde te woerde Cont ende kenlic si allen luden
</begin>
<main>
dat Ghijsbrecht Pieter Butendijcxz op deen zide ende Machtelt Jan Westfalinxdochter op dander zide aen malcanderen in wittachtigen hilike versamen sullen in dese manieren ende vorwaerden als hierna gescreven staet te weten waert sake dat Ghijsbr Butendijc vorscr oflivich worde eer Machtelt sijn wijf vorn sonder blivende geboorte bi hoer after hem te laten soe soude Machtelt vorsz voren uut hore beider ghemeenen gueden heffen die een helfte van twee husen met allen horen toebehoren staende aen malcanderen boven in Heren-Mathijsstraet tusschen Monrijs Gheraetszoens des marsmans huse op deen zide ende Gheraet Kemp Gheraetszoens huse op dander zide ende oic dat beste bedde mit sinen toebehoren ende alsulke clederen cleynoden ende juwelen als dan ter tijt tot horen live behoren sullen vry sonder scult te gelden ende darenteynde alle ander gueden roerende ende onroerende op ende neder deellen ende alle scult ghemeen betalen naden rechte vander stede Voert waert sake dat Machtelt vorn oflivich worde eer Ghijsbr Butendijck hoer man vorscr sonder blivende geboorte bi hem after hoer te laten soe soude Ghijsbr Butendijck vorscr voren uut hore beider ghemeenen gueden heffen die drie vierendeel van eenre geheelre loeve met allen horen toebehoren staende voren in Stegeoversloot tusschen Henric des sniders huse op deen zide ende der loeve die brueder jan Boeye die Augustijn toebehoert op dander zide ende oic dat beste bedde met sinen toebehoren ende alsulke clederen juwelen ende harnasch als dan ter tijt tot sinen live behoren sal vry sonder scult te gelden ende daertegens souden Machtelden vorscr erfnamen weder heffen voren uut die helfte vanden twee husen mit horen toebehoren vorscr staende in Heren-Mathijsstraet ende darenteynde alle ander gueden roerende ende onroerende op ende neder deelen ende alle scult ghemeen betalen naden rechte vander stede Mer waert sake datsi blivende geboorten bi malcanderen after lieten soe waren alle dese vorscr vorwaerden quite ende te niete ende soe soudemen alle guede roerende ende onroerende op ende neder deellen ende alle scult ghemeen betalen naden rechte vander stede Ende want op desen tijt gheen gerecht en is soe hebben Ghijsbr Butendijck ende Machtelt vorscr elc den anderen met vorwaerden gelooft scepenen brieven te doen maken vanden hilixen vorwaerden vorscr als daertoe behoort ten eerste datter een gerecht tDordrecht is
</main>
<end>
Dit hebben besegelt vanden rade Aernt Heymansz ende Gillijs heren Humansz
</end>