Compilatiecorpus Historisch Nederlands 1.0 (CHN): ambtelijke teksten 1250-1800: dordrecht_1409_2

<begin>
</begin>
<main>
Int jaer vorsz XVIII dage in Novembri wart hierin bevolen te teykenen een vonnesse dat gewijst is tusschen Monne Willemsz op deen zide en Florens van Kijfhoec op dander zide roerende van acht morgen lants die heer Daniel van de Merwede vercoft heeft denselven Monne vornoemt gelegen in Zwindrecht in Kijfhoec in deser manieren na woerde ende wederwoerde na brieve ende wederbrieve ende na getuge ende waerheit die scepenen gehoert hebben ende na alre bedingder talen soe heer Daniel van de Merwede dat vorscr lant uter zouter zee gedijct heeft ende Monne vorn daerin berust heeft langer dan jaer ende dach mitten jaergedinge dat hi daerin voert berusten sal na inhout sijnre brieven totter tijt toe dat scepenen beter betoech daerof gesien ende gehoert hebben dan si noch doen als recht is naden recht vander stede
</main>
<end>
</end>